Gjatë takimeve me Partinë Demokratike të Kosovës (PDK), janë shfaqur qëndrime të njëjta me ato të mëparshme, ka deklaruar zëvendëskryeministri në detyrë, Glauk Konjufca, duke folur për procesin e formimit të institucioneve të reja të Kosovës.
Konjufca tha për mediat kosovare se, sa i përket Lidhjes Demokratike të Kosovës (LDK), qëndrimi i Lëvizjes Vetëvendosje është se kjo parti ka një vullnet më të madh për tejkalimin e situatës aktuale politike.
“Ka gatishmëri më të lartë nga LDK-ja dhe mendoj se opsionet që dalin në tavolinë për arritjen e një marrëveshjeje janë në përpjesëtim me vullnetin politik. Sa më i madh të jetë vullneti dhe gatishmëria për bashkëpunim, aq më shumë rriten mundësitë për të gjetur zgjidhje”, u shpreh Konjufca.
Ndërkohë, ushtruesja e detyrës së presidentes së Kosovës, Albulena Haxhiu, ka caktuar që seanca konstituive e Kuvendit të ri, të dalë nga zgjedhjet e qershorit, të mbahet më 6 gusht.
Sipas analistëve politikë, partitë ende nuk kanë dhënë sinjale konkrete për arritjen e një marrëveshjeje që do të mundësonte krijimin e institucioneve të reja dhe shmangien e zgjedhjeve të reja.
