Nuk ka shumë rëndësi se nga cila zonë jeni, sigurisht që byrekun e keni provuar të paktën një herë.
Kombinimet e tij nuk kanë fund dhe e bëjnë këtë gatim të thjeshtë e të vjetër që nga lashtësia, një ndër shijet më të kërkuara edhe sot.
Veçantia e tij qëndron tek butësia e petëve, e njëkohësisht tek pjesa kronkate që ato formojnë sipër gjatë pjekjes.
Mbushja që ndodhet brenda është akoma më e shijshme dhe e veçantë, pasi mund të gjeni me qindra kombinime.
Çdo zonë pa dyshim që ka mënyrat e saj, por në këtë recetë AgroWeb.org ju sugjeron të provoni recetën që do të bëjë përvete këdo.
Byreku me mish qengji dhe presh do të futet shumë shpejt tek gatimet më të preferuara të të gjithë familjes.
Prandaj ndiqeni me kujdes mënyrën e saktë të përgatitjes fare lehtë.
Përbërësit
- 1 pako peta të gatshme
- 550 gr mish qengji pa kocka
- 3 presh mesatarë
- 8 lugë gjelle gjalpë
- 1 lugë gjelle piper i zi i bluar
- 2 lugë çaji kripë
Përgatitja
Për të nisur me përgatitjen e kësaj recete AgroWeb.org ju këshillon të ndizni zjarrin në temperaturë mesatare dhe në të të vendosni një tigan.
Aty shtoni mishin e qengjit të gatuhet derisa të zbutet dhe të marrë ngjyrë kafe të lehtë.
Më pas hidheni dhe vendoseni në një enë të thellë.
Mishi duhet të jetë i ndarë në fije të holla dhe i pastruar tërësisht nga kockat.
Tek tigani ndërkohë, shtoni 3 lugë gjelle gjalpë, lëreni të shkrijë e më pas shtoni copat e preshit të pastruar.
Lëreni atë të skuqet dhe zbutet bashkë me gjalpin dhe në fund shtojeni tek ena ku ndodhet edhe mishi.
Kini kujdes që presh ta pastroni si duhet dhe ta prisni në copëza të vogla.
Pasi ti keni përzier mirë, shtoni tek ena kripë dhe piperin e zi të grirë për një shije të veçantë.
Lëreni enën të ftohet dhe ndizni furrën në temperaturën 180 gradë, ndërsa në një tigan shkriniehde 5 lugët e tjera të mbetura të gjalpit.
Zgjidhni një tavë pjekje rrethore, lyejeni me pak gjalpë dhe vazhdoni me përgatitjen e petëve.
Merrni petet e gatshme, shtrojini ato në një tavolinë të pastër dhe veçoni vetëm dy prej tyre.
Vendosini njëra pas tjetrës nga pjesa më e gjerë e tyre dhe puthitini pak në fund.
Në pjesën më të gjerë hidhni me lugë pak nga mbushja e preshit me mishin dhe filloni te rrotulloni të dy petët derisa të formohet një cilindër i gjatë.
Bëjeni këtë me çdo petë dy nga dy, derisa ato dhe mbushja të mbarojnë.
Më pas vendosni çdo cilindër tek tava rrethore e pjekjes, duke ndjekur radhët e rrathëve njëri pas tjetrit derisa të formohet i gjithë byreku.
Për pjekjen
Kur të keni mbaruar, pjesën tjetër të gjalpin të shkrirë spërkateni sipër byrekut tuaj e më pas mund ta fusni në furrë për 30 40 minuta.
Piqeni në temperaturën 180 gradë derisa sipërfaqja e tij të ketë marrë ngjyrë të artë.
Pasi të jetë pjekur nxirreni nga furra dhe lëreni për disa minuta të mbuluar në temperaturë ambienti.
Më pas mund t’a konsumoni të ngrohtë, shija do të jetë e mrekullueshme./AgroWeb.org
