Komisioni Legjislativ sot mbështeti Propozimin për një rezolutë në lidhje me agresionin ushtarak të Federatës Ruse kundër Ukrainës, i cili dënon fuqishëm, siç u tha, një akt të hapur agresioni dhe ndërhyrje ushtarake kundër një shteti të pavarur dhe të njohur ndërkombëtarisht. Rezoluta u propozua nga klubet parlamentare të Partisë Socialdemokrate, Partia Demokratike e Socialistëve, Partia Liberale, Koalicioni „E zeza mbi të bardhë“, Partia Boshnjake, Socialdemokratët, Lista Shqiptare dhe Koalicioni „Bashkë nji za“. Siç thuhet në rezolutë, Asambleja u bën thirrje autoriteteve të Federatës Ruse që të ndalojnë urgjentisht operacionet ushtarake dhe t’i japin fund aktit të agresionit që cenon drejtpërdrejt sovranitetin dhe integritetin territorial të Ukrainës, shkatërron objektet ushtarake dhe civile dhe rrezikon jetën e miliona njerëzve – kryesisht civilë. Dokumenti mbështet masat e BE-së dhe vendeve partnere për të shtypur aktet e agresionit dhe shpreh gatishmërinë e plotë që Mali i Zi të harmonizojë plotësisht politikën e tij me aleatët e tij, në përputhje me parimet universale të drejtësisë dhe nevojën për të vendosur paqen në zonën nën agresion.
