Ministria e Zhvillimit Ekonomik dhe Turizmit të Malit të Zi po përgatit masa të reja për zbutjen e pasojave të krizës së paralajmëruar energjetike në vjeshtë, në kuadër të të cilave do t’i paraqesë propozimin Ministrit të Financave, Aleksandar Damjanoviq, për heqjen e taksës së vlerës së shtuar për energjinë diellore. Kështu thuhet në njoftimin e Ministrisë së Zhvillimit Ekonomik dhe Turizmit, të cilin e ka nënshkruar ministri i atij dikasteri, Goran Gjuroviq. Ulja e TVSH-së për energjinë diellore, siç tha ministri i Zhvillimit Ekonomik, Goran Gjuroviq, synon një kalim më të shpejtë drejt burimeve të rinovueshme, i cili do të sigurojë një furnizim më të mirë me energji elektrike në afat të gjatë dhe do të ndihmojë qytetarët dhe ekonominë në rast të ndërprerjeve të tregut dhe situatave të këqija hidrologjike. Masa për heqjen e TVSH-së për panelet diellore u njoftua së fundmi nga Qeveria e Republikës së Kroacisë. Ministria e Zhvillimit Ekonomik dhe Turizmit rikujton se për shkak të trazirave në tregun e energjisë gjatë muajve të fundit, Qeveria e Malit të Zi ka ulur akcizën për karburantet për 50 për qind, për këtë arsye është më e lira në rajon, ndërsa me bashkëpunimin e MERT dhe Ministrisë së Bujqësisë, Pylltarisë dhe Menaxhimit të Ujërave, çmimi i peletit kufizohet maksimalisht në 269 euro për ton tek prodhuesi dhe 320 euro në tregtinë me pakicë. Nëpërmjet nënshkrimit të marrëveshjes për bashkëpunim me rrjetet më të mëdha të shitjes me pakicë në vend, sigurohet vazhdimësia e furnizimit me ushqime bazë dhe të gjitha ushqimet e tjera në muajt në vijim, me detyrimin e mbajtjes së rezervave nëse është e nevojshme. Për t’iu përgjigjur rritjes së inflacionit, Ministria e Zhvillimit Ekonomik dhe Turizmit ka kufizuar gjithashtu marzhet në çmimet me shumicë dhe pakicë të vajit, miellit, kripës dhe sheqerit, duke monitoruar dhe analizuar me vigjilencë tendencat e tregut. “Pavarësisht votave të disa partive që votuan mosbesimin ndaj qeverisë aktuale javën e kaluar, ajo do të vazhdojë të punojë në ditët në vijim për masat e reja në ndihmë të qytetarëve dhe ekonomisë për të përballuar të gjitha sfidat që e presin vendin në vjeshtë”, përfundoi Gjuroviq.
