Foto: predsjednik.me
Presidenti i Malit të Zi, Jakov Millatoviq, tha se vendimi i Malit të Zi për t’u bërë anëtar i NATO-s në vitin 2017 ishte i rëndësishëm, jo vetëm për vendin, por edhe për stabilitetin e përgjithshëm të rajonit.
Presidenti i Malit të Zi tha se Mali i Zi, si anëtar i plotë i Aleancës, është i përkushtuar ndaj gjithçkaje për të cilën është angazhuar si pjesë e aleancës, përfshirë angazhimet e mbrojtjes.
“Mali i Zi është tashmë midis vendeve që shpenzojnë më shumë se dy përqind për mbrojtje. Ne jemi të përkushtuar të shpenzojmë edhe më shumë dhe kjo do të diskutohet në samitin në Hagë. Një objektiv i ri prej tre përqind është tani në diskutim. Ne tashmë po përmbushim atë që u ra dakord dhe besoj se do të jemi të përkushtuar ndaj gjithçkaje që del nga Samiti në Hagë”, theksoi Millatoviq, duke kujtuar se Mali i Zi kontribuon në mbrojtjen kolektive, veçanërisht në krahun lindor të Aleancës.
Mendimi i tij është se Mali i Zi mund të jetë një “model për t’u ndjekur” në shumë çështje, veçanërisht, siç thotë ai, në marrëdhëniet e fqinjësisë së mirë.
Po ashtu, ai deklaroi se Mali i Zi është vendi më i përparuar sa i përket anëtarësimit të mundshëm në BE. Duke folur për rëndësinë e Samitit të NATO-s për të rinjtë, Millatoviq tha se është një platformë e shkëlqyer, sepse të rinjtë janë e ardhmja e vendeve të NATO-s.
“Shumë shpejt, shumë prej jush që tani jeni ulur në audiencë do të jeni në pozicionin tim, ose në pozicionin e zëvendëssekretarit të përgjithshëm, apo edhe sekretarit të përgjithshëm. Ju do të merrni vendime për të ardhmen e aleancës sonë”, tha presidenti i Malit të Zi.
