Përvojat amerikane në fushën e digjitalizimit të shërbimeve publike janë shembull i mirë dhe se në periudhën e ardhshme duhet të vendosen modele bashkëpunimi dhe shkëmbimi përvojash në drejtim të përmirësimit të cilësisë së shërbimeve publike, modernizimit dhe inovacionit në sektorin publik. Këtë e theksoi ministri i Administratës Publike, Marash Dukaj, i cili u takua me zyrtarin e lartë të Shtetit të Michigan Mark Tisdel, si dhe me këshilltarin e qytetit të Livonias Rob Gjonaj. Në takim u bisedua për përmirësimin e bashkëpunimit në fushën e sigurisë kibernetike, reformën e administratës publike dhe veçanërisht transformimin digjital dhe profesionalizimin e administratës publike. “Bashkëbiseduesit vlerësuan se ka hapësirë të konsiderueshme për bashkëpunim mes dy vendeve dhe shkëmbim të praktikave më të mira dhe bashkëpunim në shumë fusha”, thuhet në njoftim.
Në takim morën pjesë edhe kryetari i shoqatës “Jehona e Malësisë” nga Michigan, Vilson Sinishtaj, si dhe sekretari i kësaj shoqate, Agron Dedivanaj.
