Ministri i Administratës Publike, Marash Dukaj, në kuadër të vizitës zyrtare në Francë, ka takuar Drejtorin e Përgjithshëm të Agjencisë për Siguri Kibernetike – ANSSI, Vincent Strubel.
Sipas njoftimit, Dukaj e njoftoi bashkëbiseduesin për të arriturat e Ministrisë së Administratës Publike në fushën e digjitalizimit dhe sigurisë kibernetike dhe prioritetet kryesore.
“Ministria e Administratës Publike është në fazën përfundimtare të harmonizimit të Ligjit për Sigurinë e Informacionit me dispozitat ligjore të Bashkimit Evropian. Ky ligj do të përcaktojë në mënyrë normative kompetencat e Agjencisë për Sigurinë Kibernetike, krijimi i së cilës do të forcojë më tej kapacitetet administrative në këtë fushë, me qëllim parandalimin dhe mbrojtjen nga incidentet e sigurisë kompjuterike në internet dhe rreziqe të tjera të këtij lloji,” tha Dukaj.
Ai gjithashtu theksoi se në Ministrinë e Administratës Publike është formuar CIRT-i i Qeverisë me funksionin SOC (Security Operation Center), rol operacional i parandalimit të incidenteve, i cili monitoron ekosistemin e krijuar kibernetik 24/7.
Drejtori Strubel falënderoi Dukajn për vizitën dhe përshëndeti aktivitetet e ndërmarra nga Mali i Zi në fushën e sigurisë kibernetike. Strubel vuri në dukje se Agjencia Kombëtare e Sigurisë Kibernetike e Francës monitoron kërcënimet aktuale kibernetike dhe analizon ndikimin e tyre në sisteme në mënyrë që të identifikojë rreziqet e mundshme.
Ai gjithashtu shprehu hapjen përmes ekspertizës dhe përvojave në parandalimin dhe luftën kundër sulmeve dhe kërcënimeve kibernetike, si dhe përmes mundësive për bashkëpunim në zhvillimin dhe zbatimin e teknologjive dhe mjeteve të reja për forcimin e sigurisë kibernetike.
Bashkëbiseduesit mirëpritën synimin për të krijuar në Mal të Zi Qendrën Rajonale për Sigurinë Kibernetike dhe Zhvillimin e Kapaciteteve Kibernetike të Ballkanit Perëndimor (WB3C), e cila do të vendosë një themel të ri në tre fusha prioritare – forcimin e sigurisë kibernetike, bashkëpunimin rajonal dhe procesin e integrimit evropian.
Në këtë drejtim, u theksua rëndësia e ndërgjegjësimit për kërcënimet kibernetike dhe nxitja e bashkëpunimit rajonal dhe ndërkombëtar në fushën e sigurisë kibernetike, përmes kontributit në një reagim më efektiv ndaj kërcënimeve kibernetike ndërkufitare dhe forcimit të stabilitetit të rajonit.
