Sot në Podgoricë është hapur objekti i ri i Klinikës për Psikiatri në kuadër të Qendrës Klinike të Malit të Zi, për të cilin janë ndarë 7.320.000 euro nga buxheti i shtetit.
Ministri i Shëndetësisë, Dr. Vojislav Shimun, tha se klinika e re është ndërtuar sipas standardeve më moderne mjekësore, se ajo i ka të gjitha objektet e nevojshme për trajtimin e pacientëve me probleme mendore dhe se paraqet një pikë kthese në kujdesin e shtetit ndaj pacientëve, por edhe në kujdesin për kushtet në të cilat punojnë mjekët dhe personeli mjekësor.
Ai theksoi se për herë të parë në Mal të Zi, në kuadër të klinikës së re, funksionon edhe departamenti për psikiatrinë e fëmijëve.
“Deri tani kemi ofruar shërbime ambulatore për pacientët e rinj me kushte të tilla dhe për trajtim spitalor i kemi dërguar në vendet e rajonit”, shtoi ministri. Drejtori i QKMZ Aleksandër Radoviq tha se sot është një nga momentet kyçe në zhvillimin e mjekësisë në Mal të Zi.
Ai theksoi se Klinika po zhvendoset nga objekti i përkohshëm i parafabrikatit në të cilin ndodhet për 50 vjet.
“Sot po e zhvendosim këtë degë të rëndësishme të mjekësisë në një nga objektet shëndetësore më moderne në vend. Klinika ndjek standardet moderne mjekësore, kështu që shëndeti mendor vendoset lart në shkallën e sistemit shëndetësor, zvogëlohet stigma lidhur me sëmundjet mendore”, tha Radoviq.
Ai tha se në kuadër të Klinikës do të funksionojnë pesë departamente për çrregullime psikotike, çrregullime afektive jopsikotike dhe gjendje krize, si dhe departamente për çrregullime të shkaktuara nga përdorimi dhe varësia nga substancat dhe psikiatria e fëmijëve dhe adoleshentëve.
