Samiti i katërt i Diasporës Shqiptare është hapur në Tiranë me moton “Përmes rrënjëve lartësohemi”, ku Presidenti i Shqipërisë, Bajram Begaj, theksoi rëndësinë strategjike të diasporës për të ardhmen e vendit.
Ai e cilësoi diasporën si një nga zërat më të besueshëm të Shqipërisë në arenën ndërkombëtare, si një formë të diplomacisë publike dhe si urë të rëndësishme ekonomike me botën.
Sipas tij, diaspora nuk duhet parë më vetëm në aspektin emocional apo të largimit nga vendlindja, por si një faktor aktiv që ndikon drejtpërdrejt në politikat dhe zhvillimin global të Shqipërisë.
Begaj theksoi se synimi i samitit është që kursimet dhe potenciali i diasporës të kthehen në kapital zhvillimi dhe investime konkrete në sektorë si energjia, turizmi, bujqësia dhe ekonomia në përgjithësi.
Ai u shpreh se diaspora duhet të jetë partnere e së ardhmes së Shqipërisë, duke kaluar nga roli i mbështetjes familjare dhe remitancave në një rol më të gjerë zhvillimor dhe investues.
Presidenti e përshkroi diasporën si “mushkëria” e ekonomisë shqiptare, duke nënvizuar kontributin e saj të vazhdueshëm ndër vite, por theksoi nevojën për një qasje të re ku ajo të përfshihet si partner i barabartë në proceset e zhvillimit ekonomik dhe institucional të vendit.
Në fjalën e tij, ai u ndal edhe te integrimi evropian, duke thënë se diaspora luan rol të rëndësishëm në këtë proces, jo vetëm si mbështetje, por edhe si përvojë e vlefshme nga vendet ku jeton.
Begaj theksoi se Shqipëria synon anëtarësimin në Bashkimin Evropian deri në vitin 2030, por paralelisht duhet të ruajë dhe forcojë identitetin e saj kulturor dhe gjuhësor.
Në këtë kuadër, ai vuri theks të veçantë te rëndësia e ruajtjes së gjuhës shqipe, arsimit dhe krijimit të qendrave kulturore në diasporë, për të mos humbur lidhjen e brezave të rinj me atdheun.
Në përfundim, mesazhi kryesor i Begajt ishte se diaspora duhet të shihet si partner afatgjatë i Shqipërisë në zhvillim ekonomik, integrim evropian dhe ruajtje të identitetit kombëtar. Samiti vazhdoi më pas edhe me dekorimin e disa personaliteteve të diasporës.
