Presidenti i Malit të Zi, Jakov Millatoviq, tha se Samiti i vendeve të Ballkanit Perëndimor dhe Bashkimit Evropian në Bruksel është një mundësi e mirë për të përsëritur edhe një herë të gjitha gjërat pozitive që ndodhën në Mal të Zi në muajt e fundit.
Ai përsëriti se qëllimi dhe pozicioni aktual i Malit të Zi është që deri në vitin 2028 të bëhet anëtar i BE-së.
“Qeveria e re tashmë ka ndërmarrë hapat e parë në rrugën e emërimit të posteve të rëndësishme në gjyqësor. Mali i Zi është vendi më i avancuar nga vendet kandidate dhe ai parim i regatës duhet të ketë dinamikën e vet dhe do ta prezantoj sot me synimin për t’u bërë një anëtar i BE-së deri në vitin 2028 dhe ky është pozicioni ynë”, u tha Millatoviq gazetarëve në Bruksel.
Presidenti u shpreh i kënaqur që ka mundësinë të prezantojë rezultatet që ka arritur Mali i Zi në muajt e fundit, veçanërisht në fushën e sundimit të ligjit dhe përkujtoi se Mali i Zi ka një politikë të jashtme dhe të sigurisë plotësisht të harmonizuar me BE, dhe se nuk ka çështje të hapura me fqinjët e saj dhe se është ekonomikisht më e avancuara.
Prandaj, ai edhe një herë theksoi qartë se qëndrimi që do të përfaqësojë në këtë samit është që Mali i Zi të jetë anëtar i plotë i BE-së deri në vitin 2028.
“Agresioni i Rusisë kundër Ukrainës tregoi se procesi i zgjerimit nuk është vetëm një çështje teknike, por se ka një rëndësi gjeopolitike dhe të sigurisë për të gjithë kontinentin evropian. Ky është një moment nga i cili duhet të përfitojmë të gjithë – si Brukseli ashtu edhe vendet anëtare të BE-së dhe vendet kandidate”, theksoi Millatoviq dhe shtoi se nuk është e lehtë të kombinohen interesat kombëtare të shteteve anëtare dhe të shteteve kandidate dhe se historia e BE-së është një histori e gjetjes së një konsensusi, siç është edhe ky samit.
Ai tha se politika e zgjerimit, si politika më e suksesshme e Bashkimit Evropian, duhet të bazohet në progresin sipas meritës, sepse kjo është e vetmja mënyrë për të vlerësuar drejt përpjekjet e vendeve që kanë avancuar më shumë në procesin e negociatave.
Presidenti përsëriti se “anëtarësimi i Malit të Zi në BE është një histori shumë më e madhe se Mali i Zi” dhe konkludoi se është në interesin e Bashkimit Evropian që të ketë një histori pozitive për zgjerimin sepse anëtarësimi i Malit të Zi në BE do të ishte një sinjal i mirë për të tjerët.
