Ministria për Europën dhe Punët e Jashtme ka njoftuar sot masat e reja anticovid për qytetarët që duan të hyjnë në Republikën e Kosovës.
Duke filluar nga sot të gjithë qytetarët të cilët do të hyjnë në territorin e Kosovës do duhet të paraqesin certifikatën e vaksinimit, dëshminë që ka kaluar Covid, test PCR, ose një prej masave të tjera të renditura:
- Certifikatën e vaksinimit të plotë kundër COVID-19;
- Dëshminë që keni kaluar COVID-19;
- Test RT-PCR pozitiv i lëshuar jo më pak se 21 ditë dhe jo më vonë se 180 ditë; ose
- Rezultat pozitiv i testit të antitrupave serologjik –IgG, lëshuar jo më shumë se 30 ditë para;
- Testi RT-PCR negativ, jo më të vjetër se 72 orë;
- Test i shpejtë antigjen negativ jo më të vjetër se 48 orë.
Për shtetasit e Republikës së Kosovës, si dhe personat me leje qëndrimi të përkohshëm ose të përhershëm në Kosovë, të cilët hyjnë në Republikën e Kosovës, në rast se nuk posedojnë një nga dokumentet e mësipërme, duhet të vetë-izolohen për 7 ditë. Këto persona duhet të plotësojnë një deklaratë për vetë-izolim në pikën kufitare përkatëse. Ndërkohë nga këto rregulla përjashtohen persona të cilët hyjnë në Kosovë përmes aeroportit apo përmes pikave kufitare tokësore dhe largohen nga Kosova brenda tri orësh me kusht që në hyrje të nënshkruajnë deklaratën se do të largohen brenda tri orësh.
