Komisionerja evropiane për Zgjerim, Marta Kos, kritikoi ndryshimet në Ligjin për Dhomat e Specializuara të Kosovës, duke i cilësuar ato si të papajtueshme me detyrimet e Kosovës ndaj Bashkimit Evropian (BE).
Para takimit të ministrave të Jashtëm të BE-së në Luksemburg, më 12 tetor, ajo theksoi se ndryshimi i rregullave ligjore gjatë zhvillimit të proceseve gjyqësore bie ndesh me standardet ndërkombëtare të sundimit të ligjit dhe është i papranueshëm.
Reagimi i saj vjen pasi Kuvendi i Kosovës miratoi ndryshimet e propozuara nga Partia Demokratike e Kosovës, të cilat synojnë të kufizojnë juridiksionin e Gjykatës Speciale, përfshirë uljen e dënimit maksimal në 15 vjet burgim dhe mundësinë e ankimimit në Gjykatën Supreme të Kosovës.
Edhe Bashkimi Evropian dhe Ambasada e Gjermanisë në Prishtinë kanë shprehur shqetësime, duke kërkuar respektimin e pavarësisë së Dhomave të Specializuara dhe të detyrimeve ndërkombëtare të Kosovës.
Nga ana tjetër, PDK-ja ka mbrojtur ndryshimet, duke argumentuar se synimi nuk është mbyllja e gjykatës, por kufizimi i mandatit të saj.
Kos paralajmëroi se vendet kandidate që bëjnë hapa prapa në sundimin e ligjit dhe në përmbushjen e detyrimeve nuk do të mund të përparojnë drejt anëtarësimit në BE.
Kjo çështje shton tensionet mes Prishtinës dhe Brukselit, në një kohë kur Kosova ende nuk e ka marrë statusin e vendit kandidat për anëtarësim.
