Foto: Ministria e Energjisë dhe Minierave / Ministarstvo energetike i rudarstva
Mali i Zi ka hyrë në një fazë të re ku politika energjetike po matet gjithnjë e më shumë me projekte konkrete, kapacitete të reja prodhuese dhe investime, tha ministri i Energjisë dhe Minierave, Admir Shahmanoviq.
Në hapjen e “Energy Week Western Balkans” në Budva, ai theksoi përfundimin e një pjese të Korridorit Transballkanik deri në Pljevlë dhe fazën e parë të parkut të erës “Gvozd”, me kapacitet 54.6 MW, ndërsa faza e dytë pritet të sjellë edhe 21 MW të tjerë.
Shahmanoviq përmendi gjithashtu investimet në rrjetin e transmetimit, përfshirë marrëveshjen prej 25 milionë eurosh me Agjencinë Franceze për Zhvillim për modernizimin e nënstacioneve “Peruqica” dhe “Plevla 2”, si dhe një grant të planifikuar prej 8.5 milionë eurosh nga BE-ja.
Ai paralajmëroi vazhdimin e zhvillimit të burimeve të rinovueshme, organizimin e ankandeve për kapacitete të reja dhe përgatitjen e procedurës për përzgjedhjen e partnerit strategjik për sistemet e baterive për ruajtjen e energjisë elektrike.
Sipas tij, përparimi në Kapitullin 15 – Energjia dhe krijimi i një kuadri më të qëndrueshëm rregullator do të rrisin sigurinë për investitorët. “Mali i Zi është i gatshëm për një cikël të ri investimesh”, tha Shahmanoviq, duke veçuar edhe partneritetet ndërkombëtare, përfshirë bashkëpunimin strategjik me kompaninë Masdar.
