Zjarrfikësit në disa vende të Ballkanit po përballen me zjarre të shumta, ndërsa vala e nxehtësisë pritet të arrijë kulmin me temperatura deri në 40 gradë Celsius në disa zona.
Temperaturat e larta dhe thatësira e vazhdueshme kanë favorizuar përhapjen e zjarreve, veçanërisht në Serbi, ku një person humbi jetën në një fshat rreth 80 kilometra në lindje të Beogradit, pasi humbi kontrollin e një zjarri që kishte ndezur pranë shtëpisë së tij.
Një zjarr i madh pyjor në Serbinë qendrore ka dalë jashtë kontrollit, ndërsa ekipet e zjarrfikësve, të ndihmuara nga avionë për shuarjen e zjarreve, po përpiqen të mbrojnë zonat e banuara.
Pamjet nga mediat lokale tregojnë tym të dendur që ngrihet mbi pyjet me pisha, ndërsa flakët kanë përfshirë kodrat pranë banesave.
Tymi nga një zjarr në një rezervat natyror në verilindje të Beogradit është parë edhe nga kryeqyteti serb.
Autoritetet kanë lëshuar paralajmërime për rrezik ekstrem nga zjarret në pjesën më të madhe të rajonit.
Policia serbe ka bërë thirrje për kujdes maksimal dhe respektim të ndalimeve për ndezjen e zjarreve, duke theksuar se rastet e pakujdesisë mund të kenë pasoja tragjike.
Vala e të nxehtit ka përkeqësuar edhe thatësirën që ka prekur pjesë të mëdha të Evropës.
Ndërkohë, disa segmente të lumit Danub kanë shënuar nivele rekord të ulëta të ujit, duke ndikuar në prodhimin e energjisë hidroelektrike dhe transportin e naftës drejt Serbisë.
Edhe Shqipëria po përballet me rrezik të shtuar nga zjarret për shkak të temperaturave të larta dhe thatësirës së zgjatur.
Autoritetet shqiptare kanë angazhuar forca zjarrfikëse, Forcat e Armatosura dhe mjete ajrore për përballimin e vatrave aktive në disa zona të vendit.
