Foto: Qeveria e Malit të Zi / Vlada Crne Gore
Shefi i Delegacionit të BE-së në Mal të Zi, Johan Sattler, ka deklaruar për TVMZ se Bashkimi Evropian pret që Gjykata Kushtetuese të plotësohet deri para pushimit veror, përmes një marrëveshjeje dhe vendimeve të Kuvendit.
Ai theksoi se ka hapësirë që të gjithë kapitujt e negociatave të mbyllen deri në fund të vitit dhe se BE-ja mbështet ambicien e qeverisë për përmbylljen e procesit integrues.
Sattler kërkoi rezultate konkrete nga sistemi i drejtësisë, përmes vendimeve të formës së prerë dhe uljes së ndikimit politik në gjyqësor, si dhe emërime të bazuara në meritë.
Ai përmendi si prioritete zgjedhjen e anëtarëve të Këshillit Gjyqësor dhe gjyqtarëve të Gjykatës Kushtetuese me shumicë të kualifikuar në parlament, duke theksuar se këto janë kushte të rëndësishme për kapitullin 23.
Sipas tij, priten edhe disa përparime para pushimit veror dhe hapja e më shumë konferencave ndërqeveritare për të përshpejtuar mbylljen e kapitujve.
Në fund, Sattler vlerësoi se edhe nëse procesi zgjat në vitin e ardhshëm, kjo nuk do të ishte “tragjedi”, por theksoi se zgjedhjet e ardhshme mund të ndikojnë në ritmin e punës së parlamentit.
