Foto: Kuvendi i Malit të Zi / Skupština Crne Gore
Në Kuvendin e Malit të Zi është zhvilluar debat i gjerë për ndryshimet dhe plotësimet e Ligjit për Gjykatën Kushtetuese, ku qeveria dhe opozita kanë qëndrime krejt të ndryshme.
Ministri i Drejtësisë, Bojan Bozhoviq, ka thënë se propozimi është hartuar në përputhje me rekomandimet e Komisionit të Venecias. Sipas tij, ndryshimet synojnë të rregullojnë qartë kufirin e moshës së gjyqtarëve të Gjykatës Kushtetuese, të vendosin një mekanizëm automatik për njoftimin e daljes në pension, të lejojnë vazhdimin e punës së gjyqtarëve deri në emërimin e të rinjve dhe të përmirësojnë rregullat për konfliktin e interesit.
Bozhoviq theksoi se pa “dritën e gjelbër” të Komisionit të Venecias apo BE-së, Ministria nuk dërgon ligje në Kuvend.
Opozita, veçanërisht PDS-ja, e ka kundërshtuar ashpër këtë nismë, duke e cilësuar si jokushtetuese.
Deputeti Andrija Nikoliq tha se Kushtetuta përcakton qartë mandatin 12-vjeçar të gjyqtarëve dhe se ky mandat nuk mund të ndryshohet me ligj. Ai akuzoi shumicën se po tenton të anashkalojë Kushtetutën dhe paralajmëroi se kjo dëmton sundimin e ligjit dhe procesin evropian.
Nga ana tjetër, deputetë të shumicës dhe partive të tjera e kanë mbrojtur propozimin, duke thënë se ai synon funksionalitetin e sistemit dhe zbatimin e rekomandimeve ndërkombëtare, sidomos atyre të Komisionit të Venecias, për të shmangur bllokimin e Gjykatës Kushtetuese.
Debati është shoqëruar edhe me akuza politike. Disa deputetë të opozitës kanë kërkuar reagim nga Gjykata Kushtetuese dhe Presidenti, ndërsa nga opozita është theksuar se vendi ndodhet në një krizë kushtetuese.
Deputetë të tjerë kanë theksuar nevojën për deblokimin e Gjykatës Kushtetuese, duke kujtuar edhe rekomandimet e mëhershme të Venecias për të siguruar vazhdimësinë e punës së saj.
Kuvendi pritet të votojë për këto ndryshime në një seancë të ardhshme.
