Reforma e legjislacionit zgjedhor është shumë e rëndësishme dhe Qeveria i jep mbështetje të plotë Komisionit Legjislativ të Kuvendit për të përfunduar këtë punë kërkuese, tha kryeministri Millojko Spajiq në një takim me drejtorin e ODIHR, Mateo Mekaçiq.
Në bisedë u theksua se në këtë mënyrë do të rritet besimi i qytetarëve në të gjithë procesin zgjedhor, dhe arritja e standardeve më të larta evropiane është një nga kushtet për integrim në BE.
“Tani duket se është momenti i duhur për të reformuar legjislacionin zgjedhor, sepse ka një vullnet të madh politik për të bërë reforma të rëndësishme, të cilat janë në të mirë të të gjithë qytetarëve të Malit të Zi, jo të partive apo individëve. Nuk duhet ta humbim atë shans”, ka thënë Spajiq.
Drejtori i Zyrës për Institucione Demokratike dhe të Drejtat e Njeriut theksoi se nuk ekziston një sistem zgjedhor i përsosur që do të funksiononte në çdo vend, por se ka shumë rekomandime që i gjithë ky proces në Mal të Zi të ngrihet në një nivel më të lartë.
“Çdo sistem ka specifikat e veta dhe një nga avantazhet e ODIHR-it është se ne shikojmë situatën në disa vende dhe kemi shumë përvojë. Mendoj se si vend ju keni mundësi të gjeni zgjidhje tani, sepse keni hapësirë të mjaftueshme për të zbatuar rekomandimet. Ne jemi të gatshëm të jemi mbështetës dhe të ofrojmë ndihmë në çështjet teknike”, tha Mekaçiq.
Në takim u diskutua edhe për vendimet e rëndësishme të marra në muajt e fundit, të cilat janë tregues se shoqëria në Mal të Zi është e gatshme të punojë efektivisht në reforma të thella.
Po ashtu, u vu në dukje edhe rëndësia e madhe e pranisë së vëzhguesve të ODIHR-it gjatë zgjedhjeve të vitit 2023, e cila ndihmoi në forcimin e procesit zgjedhor dhe rritjen e besimit të qytetarëve ndaj tij.
Në fund, u konstatua se komunikimi efektiv do të vazhdojë dhe se ODIHR mund të llogarisë në qasjen e përgjegjshme të Qeverisë për të vazhduar me sukses kryerjen e punës së saj të rëndësishme.
