Presidenti i Malit të Zi Jakov Millatoviq ka biseduar mëngjesin e sotëm me drejtorin e ODIHR-it, Mateo Mekaçiq.
Gjatë takimit, u theksua rëndësia e reformës zgjedhore, duke përfshirë demokratizimin e mëtejshëm të vendit, duke kujtuar se prania e ekspertëve të ODIHR-it, si dhe raportet për zhvillimin e zgjedhjeve dhe rekomandimet e ekspertëve, janë udhëzime kyçe për përmirësimin e procesit zgjedhor në Mal të Zi.
Siç thuhet në komunikatën e Zyrës së Presidentit, theksohet se ka pritshmëri që procesi i reformës së legjislacionit zgjedhor të jetë gjithëpërfshirës dhe i suksesshëm, duke pasur parasysh rëndësinë e kësaj çështjeje për rrugën drejt BE-së të Malit të Zi.
Presidenti Millatoviq theksoi se Komisioni i ri për Reformën Zgjedhore, i cili u konstituua në fund të vitit 2023, ka një detyrë të vështirë por edhe udhëzime të qarta për veprimet e ardhshme.
Ai theksoi se synimet kryesore për përmirësimin e procesit zgjedhor në Mal të Zi janë: profesionalizimi i administratës zgjedhore, kontrolli më i mirë i financimit të fushatave dhe keqpërdorimi i burimeve publike, redaktimi i listës zgjedhore dhe futja e listave të hapura dhe kandidaturave individuale.
Në takim u theksua gjithashtu se nevojitet një pjesëmarrje më e madhe e grave në politikën malazeze.
