Foto: Tv Boin
Sot është mbajtur seanca e XII e Kuvendit të Komunës së Tuzit, në të cilën ishin të parapara 17 pika të rendit të ditës.
Kryetari i Kuvendit të komunës së Tuzit, Fadil Kajoshaj, në fillim të kësaj seance kërkoi që së pari të miratohet proces verbali i seancës së kaluar, ku të gjithë këshilltarët prezent u deklaruan pro.
Përpara se të fillonin punën me pikat e parapara për këtë seancë, nënkryetari i Kuvendit të Malit të Zi, Nikollë Camaj, kërkoi fjalën e rastit ku theksoi çështjen e 2 prillit, ku tifozët e lojtarëve kundërshtuese „Buduqnost“ sulmuan lokalet dhe potencoi që ngjarjet e ndodhura mbrëmjen e kaluar janë tone politike dhe jo të fushës së sportit.
Në mungesë të kryetarit të Komunës së Tuzit, Lindon Gjelaj, nënkryetari Fisnik Gjokaj hapi pikën e parë të rendit të ditës, që ishte propozimi i Konkludimit mbi miratimin e Raportit të punës së kryetarit, organeve të administratës dhe shërbimeve të komunës së Tuzit për vitin 2024.
Gjatë periudhës raportuese, Sekretariati i Komunës ka organizuar dhe marrë pjesë në një sërë aktivitetesh dhe trajnimesh kombëtare dhe rajonale, duke përfshirë seminare mbi shëndetin dhe sigurinë në punë, mbrojtjen e të dhënave personale, punën ekipore, dhe menaxhimin e projekteve. Po ashtu, Sekretariati ka realizuar detyra zhvillimore dhe normative, duke kontribuar në mbështetje për zhvillimin e bujqësisë dhe zonave rurale, si dhe ka angazhuar shërbime për mirëmbajtjen e infrastrukturës lokale. Në fushën e urbanizmit dhe pronës, ai ka përmbushur obligimet ligjore dhe ka kontribuar në ruajtjen e mjedisit dhe gjelbërimit, duke menaxhuar parqe dhe hapësira publike. Aktivitetet e tjera përfshijnë mirëmbajtjen e rrugëve, varrezave, dhe hapësirave të tjera publike, si dhe mbështetje për klubet sportive dhe zhvillimin e sektorëve të tjerë të rëndësishëm për komunitetin.
Në lidhje me pikën e parë këshilltari Shtjefën Camaj nuk u pajtua me disa gjëra nga Policia Komunale, ku shërbimi i tyre, mbetet i dëshirueshëm duke theksuar se në afërsi të godinës së Komunës, akoma hedhen mbeturina.
Camaj po ashtu përmendi edhe shitjen jashtë tezgave dhe në rrugë, ku për qytetarët është shumë e rrezikshme.
Nënkryetari Ivan Ivanaj shprehet se për sa i përket shërbimit të Policisë Komunale, nuk është e lehtë të zbatohen, ngaqë është popullsi e vogël dhe në një farë mënyre njihen me njëri-tjetrin.
Ivanaj theksoi se këtë vit është e paraparë një merimangë për zhvendosjen e makinave që parkohen në mënyrë të parregullt.
Këshilltari Shtefjën Camaj tha se zgjedhja apo seleksionimi i atyre që duhet ndeshkuar, nuk duhet të jenë të përzgjedhur, qoftë ata të Forumit apo jo, sepse “jemi ne ata që krijojmë një pushtet”.
Këshilltari Petrit Gjokaj me rastin e ndeshjes së fundmi, që u luajt me 2 prill, tha se tifozat “Barbarët – Varvari” shkatërruan dhe kanë bërë akte të pahijshme mbi qytetarët e Tuzit, ku një numër i madh policësh, në mënyrë joprofesionale nuk ndërmorren asnjë akt për të qetësuar situatën apo për të ndëshkuar ata që shkaktuan këto akte.
Pika e dytë e rendit të ditës ishte Propozim Vendimi mbi ndryshimin e Vendimit mbi taksat lokale komunale të Komunës së Tuzit. Vendimi mbi ndryshimin e taksave lokale komunale të Komunës së Tuzit përcakton tarifa të reja për shfrytëzimin e hapësirave publike. Këto tarifa përfshijnë përdorimin e hapësirave për objekte të përkohshme, kioska, vitrina, tezgje të lëvizshme, dhe objekte për argëtim, me tarifa që ndryshojnë sipas zonës dhe llojit të objektit.
Sekretari i Sekretariatit për Financa në Komunën e Tuzit, Driton Gjokaj, në lidhje me këtë pikë ndër të tjera tha: „Me qëllim të përkrahjes së bizneseve të vogla që veprojnë në Malësi, ku përfshihen pagesa e renteve të tokës dhe shpenzimeve të tjera, është marrë vendimi që si mbështetje për sipërmarrësit taksa komunale të zbritet në 50%.“
Pika e tretë ishte Propozimi i Konkludimit mbi miratimin e Informacionit mbi gjendjen e pronës së komunës së Tuzi për vitin 2024, të cilin e prezantoi sekretarja e Sekretariatit për Pronën Elvisa Rexhematoviq, pikë kjo e cila u miratua me shumicë votash.
Pika e katërt e cila kishte të bënte me Propozimin e Programit të masave për realizimin e mjeteve të dedikuara për zhvillimin e prodhimtarisë bujqësore në Komunën e Tuzit për vitin 2025 – Agrobuxheti, në mungesë të materalit, u tërheq nga rendi i ditës për këtë seancë.
Pika e pestë Drafti i Programit të rregullimit hapësinor të Komunës së Tuzit për vitin 2025 u prezantua nga sekretari i Sekretariatit për Urbanistikë, Lekë Ivezaj, i cili ndër të tjera theksoi: „Programi i Planifikimit Hapësinor për Komunën e Tuzit për vitin 2025 përfshin përgatitjen e dokumenteve të reja të planifikimit, si dhe ndryshime në ato ekzistuese, duke u fokusuar në zhvillimin e infrastrukturës dhe mbrojtjen e pasurive kulturore e natyrore. Disa nga objektivat kryesore janë: ndërtimi i 50,000 m² hapësirë ndërtimore, krijimi i zonave për zhvillimin e infrastrukturës rrugore, energjetike dhe ujësjellësit, si dhe zbatimi i masave për ruajtjen e burimeve natyrore dhe historike. Financimi do të sigurohet nga buxheti i Komunës, fondet e donatorëve dhe ndërmarrjet publike. Afatet për zbatimin e këtyre masave janë planifikuar për periudhën 2025-2030.”
Pika e gjatë u prezantua gjithashtu nga sekretari i Sekretariatit për Urbanistikë, Lekë Ivezaj, mbi Propozimin e Vendimit mbi formimin e Shoqërisë me përgjegjësi të kufizuar të ,,Monumenti i Natyrës Kanjoni i Cemit”.
Këshilltari Mevlludin Dizdareviq në lidhje me ruajtjen e natyrës, që të mbeten pasuri për breza që vijnë, theksoi që ai vetë disa herë, që nga viti 2022, ka theksuar nevojen e një monumenti të kulturës ku në menyrë ilegale nxirret rëra.
“Si fillim ne duhet të ngrejmë ndergjegjjen tonë për të ruajtur këto pasuri që kemi” shtoi ai.
Pikat e tjera të cilat u prezantuan dhe diskutuan nga këshilltarët e Kuvendit të Komunës së Tuzit e të cilat u miratuan me shumicë votash ishin:
7. Propozimin e Vendimit mbi ndryshimin e Vendimit për bashkëfinancimin e projekteve nga fusha e kulturës;
8. Propozimin e Vendimit mbi mënyrën e krijimit dhe përcaktimin e lartësisë së pagës për punë në grupin punues për punimin e strategjisë për zhvillimin e sportit;
9. Propozimin e Vendimit mbi miratimin e Planit lokal të veprimit për të rinjtë për periudhë 2025-2026;
10. Propozimin e Konkludimit mbi miratimin e Raportit për realizimin e Planit Lokal të Veprimit për të Rinjtë për vitin 2024;
11. Propozimin e Vendimit mbi verifikimin e Vendimit mbi përfundimin e funksionit të drejtorit ekzekutiv të SHPK PijaceTregu” Tuz;
12. Propozimin e Vendimit mbi ndryshimin e Vendimit mbi themelimin e Këshillit organizativ për krijimin e kushteve për fillimin e punës të Komunës së sapoformuar të Tuzit:
13. Propozimin e Vendimit mbi dhënien е pëlqimit në Programin e ndryshuar mbi kryerjen e veprimtarive komunale të Shoqërisë me përgjegjësi të kufizuar ,,Vodovod i kanalizacija-Ujësjellësi dhe kanalizimi” Tuz për vitin 2025;
14. Propozimin e Konkludimit mbi miratimin e raportit mbi zbatimin e Planit zhvillimor strategjik të Komunës së Tuzit 2021-2026 për vitin 2024;
15. Propozimin e Konkludimit mbi miratimin e raportit mbi realizimin e planit lokal të mbrojtjes së mjedisit të komunës së Tuzit 2024-2027 për vitin 2024;
Sa i përkët pikës së gjashtëmbëdhjetë – Zgjedhje dhe emërime – Këshilli vendosi të mos e sjellin vendime për emërimin e kryetarëve apo anëtarëve të bordit por ta shtyjnë këtë pikë për seancën e ardhshme.
