Rusia tha të mërkurën se do të rikthehet në marrëveshjen që mundëson eksportimin e produkteve të grurit nga Ukraina. Moska pezulloi pjesëmarrjen në fundjavë duke kërcënuar me përshkallëzim të krizës ushqimore në gjithë botën. Marrëveshja mes Ukrainës dhe Rusisë është arritur muaj më parë me ndërmjetësim të Kombeve të Bashkuara dhe Turqisë. Ministria ruse e Mbrojtjes ka thënë se ka marrë garanci me shkrim nga Kievi se korridori në Detin e Zi, për transportin e grurit, nuk do të përdoret për operacione ushtarake kundër Rusisë. “Federata e Rusisë konsideron se garancitë e pranuara janë të mjaftueshme, ndaj do të zbatojë sërish marrëveshjen”, thuhej në deklaratën e ministrisë. Presidenti turk, Recep Tayyip Erdogan, tha ndërkohë se ministri rus i Mbrojtjes, Sergei Shoigu, i ka thënë homologut të tij turk se marrëveshja e 22 korrikut do të zbatohet prej mesditës së 2 nëntorit. Rusia e pezulloi pjesëmarrjen në marrëveshje, duke thënë se nuk mund të garantojë më sigurinë e anijeve civile në Detin e Zi, për shkak të një sulmi në flotën e saj. Ukraina e ka konsideruar këtë deklaratë si justifikim të rremë për shmangie të marrëveshjes. Pavarësisht pezullimit nga ana e Rusisë, anijet kanë vazhduar të eksportojnë grurin rus. Mirëpo diçka e tillë nuk do të mund të vazhdonte për kohë të gjatë, pasi kompanitë e sigurimit kanë thënë se nuk do të nënshkruajnë kontrata të reja për shkak të vendimit të Moskës. Presidenti ukrainas, Volodymyr Zelensky, tha ndërkohë se bota duhet të përgjigjet ashpër ndaj tentimeve të Rusisë për të bllokuar korridorin në Detin e Zi për eksportet ukrainase. Ky korridor kontrollohet nga Moska prej nisjes së luftës së Rusisë në Ukrainë më 24 shkurt. Bllokada ruse ka rezultuar me mungesa ushqimesh në botë dhe rritje të çmimeve, pasi Ukraina dhe Rusia janë ndër furnizueset më të mëdha në botë të drithërave.
