Vlerësimet e Kombeve të Bashkuara thonë se Mali i Zi do të jetë ekonomia e dytë më e prekur në Evropë, tha David Putin, një ekonomist i KB në Malin e Zi. “Për fat të keq, Mali i Zi është një nga ekonomitë më të goditura në Evropë, vlerësimi ynë është se Mali i Zi do të jetë ekonomia e dytë më e prekur në Evropë, pas Spanjës. Arsyeja është e qartë, Mali i Zi është një ekonomi e vogël e hapur, e cila varet nga turizmi,” tha Putin, si mysafir në programin e mëngjesit të TVMZ. Putini beson se çdo krizë është një shans dhe shton se është e rëndësishme që ekonomia malazeze të fitojë produktivitet. “Mali i Zi ka kohë që varet nga turizmi dhe mbase kjo është një mundësi për diversifikim dhe transformim strukturor, i cili mund të krijojë tregje të reja për aftësi të reja më të paguara që mund të lëvizin Malin e Zi në drejtim të uljes së varfërisë,” tha Putin. Ai shton, megjithatë, se ka shpresë për ekonominë tonë, veçanërisht sepse ne kemi regjistruar norma të konsiderueshme të rritjes në periudhën e mëparshme. “Duke qenë se Mali i Zi po kalon procesin e bashkimit me BE, ai është integruar mirë në ato tregje dhe në atë kuptim duhet të përdorë avantazhet për rimëkëmbjen,” deklaroi Putin. Ai gjithashtu tregon se ne duhet ta drejtojmë ekonominë drejt modeleve të hapura dhe të qëndrueshme.
