KUVENDI I SHQIPËRISË MIRATON NË PARIM BUXHETIN E VITIT 2027, OPOZITA VOTON KUNDËR

Pas 14 orësh diskutimesh, shumica socialiste, së bashku me votat e deputetëve të Tom Doshit, ka miratuar në parim projektbuxhetin e qeverisë shqiptare për vitin 2027.

Projektbuxheti mori mbështetjen e shumicës, me nëntë vota më shumë se numri i nevojshëm, ndërsa opozita votoi kundër me 24 vota.

Në votim mungoi ish-kryetarja e Kuvendit, deputetja socialiste Elisa Spiropali, e cila kishte qenë e pranishme në seancën plenare një ditë më parë.

Gjatë së njëjtës seancë, Kuvendi miratoi edhe ligjin për strehimin social, me 79 vota pro, 25 kundër dhe një abstenim, nga deputetja demokrate Greta Bardeli.

Para votimit, salla plenare u zhyt për disa sekonda në errësirë pas një ndërprerjeje të energjisë elektrike.

Deputetët e opozitës shfrytëzuan këtë incident për të kërkuar në kor dorëheqjen e kryeministrit Edi Rama.

Gjatë diskutimeve, përfaqësuesit e shumicës mbrojtën projektbuxhetin prej 10 miliardë eurosh, duke argumentuar se ai synon të ulë koston e jetesës dhe të përmirësojë mirëqenien e qytetarëve.

Ndërkohë, deputeti demokrat Saimir Korreshi pati debate dhe replika me ministrat Toni Gogu dhe Enea Karakaci, si dhe me ministrin e Financave, Petrit Malaj, lidhur me përmbajtjen e projektbuxhetit.

Pas miratimit në parim, projektbuxheti do t’u rikthehet komisioneve parlamentare, ku do të shqyrtohet nen për nen përpara votimit përfundimtar.

SHARE