Foto: Risto Božović
Presidenti i Malit të Zi, Jakov Millatoviq, tha se “Euro modeli” po shoqërohet me mungesë të të dhënave të qarta dhe debatit të mjaftueshëm publik.
Në tryezën e rrumbullakët të organizuar nga kabineti i tij, ai ngriti tri çështje kryesore që, sipas tij, ende kërkojnë përgjigje: qëndrueshmëria e programit, politika e pagave dhe e ardhmja e sistemit pensional.
Millatoviq tha se debati për modelin duhej të ishte zhvilluar para se Qeveria të miratonte ndryshimet ligjore dhe kritikoi mungesën e përfaqësuesve të saj në diskutim.
Për qëndrueshmërinë e programit, ai kërkoi të dhëna më të qarta, ndërsa për politikën e pagave vuri në dukje diferencën e vogël mes pagave të punonjësve me arsim të mesëm dhe atyre me arsim të lartë, duke paralajmëruar se kjo mund të ndikojë në motivimin për investim në arsim.
Sa i përket sistemit pensional, Millatoviq tha se ndryshimet në kontributet për Fondin PIO ngrenë pyetjen se si do të funksionojë sistemi pensional i Malit të Zi në të ardhmen, për të cilën, sipas tij, publiku ka të drejtë të marrë përgjigje.
Në fund të diskutimit, u ngritën shqetësime për ndikimin e modelit në sektorin privat dhe financat publike.
Sipas pjesëmarrësve, kompanitë e vogla mund të përballen me barrën më të madhe, ndërsa ndryshimet në paga mund të ndikojnë në tregun e punës, borxhin publik dhe qëndrueshmërinë e financave.
U ngritën gjithashtu pikëpyetje për efektin e përgjithshëm ekonomik të programit.
