Foto: predsjednik.me
Presidenti i Malit të Zi, Jakov Millatoviq, deklaroi në Organizatën e Kombeve të Bashkuara se gjenerata e tij ka përgjegjësinë që deri në vitin 2028 ta përfundojë rrugën evropiane të vendit.
Në fjalimin e tij para liderëve botërorë, ai theksoi angazhimin e Malit të Zi për multilateralizëm, bashkëpunim rajonal, integrimin evropian dhe respektimin e së drejtës ndërkombëtare.
Millatoviq përmendi situatën globale të sigurisë, duke theksuar rritjen e konflikteve të armatosura dhe numrin e madh të personave të zhvendosur.
Sipas tij, besimi ndërkombëtar nuk ndërtohet vetëm përmes deklaratave, por përmes respektimit të marrëveshjeve, institucioneve funksionale dhe zbatimit të rregullave ndërkombëtare.
Duke folur për Malin e Zi, presidenti kujtoi se këtë vit vendi shënon 20 vjet nga anëtarësimi në OKB si shtet i pavarur, ndërsa që nga viti 2017 është anëtar i NATO-s.
Si objektiv kryesor të politikës së jashtme ai veçoi anëtarësimin në Bashkimin Evropian.
“Qëllimi ynë është i qartë: që deri në vitin 2028 ta shohim me krenari flamurin e Malit të Zi mes flamujve të shteteve anëtare të Bashkimit Evropian”, tha Millatoviq.
Ai vlerësoi se e ardhmja e Ballkanit Perëndimor është në BE dhe bëri thirrje për pajtim të qëndrueshëm në rajon.
Sipas tij, pajtimi nuk mund të ndërtohet mbi mohimin e krimeve, drejtësinë selektive apo glorifikimin e personave të dënuar për krime lufte.
Millatoviq foli edhe për luftën në Ukrainë dhe situatën në Gaza.
Ai deklaroi se Mali i Zi do të vazhdojë mbështetjen për Ukrainën dhe mbështeti përpjekjet diplomatike për përfundimin e luftës.
Për Gazën, kërkoi mbrojtjen e civilëve dhe dërgimin e sigurt të ndihmës humanitare, ndërsa përsëriti mbështetjen për zgjidhjen me dy shtete, me Izraelin dhe një Palestinë të pavarur që bashkëjetojnë në paqe dhe siguri.
Në fjalim u trajtuan edhe konfliktet në Sudan, Mianmar dhe Haiti, si dhe sfidat globale që lidhen me ndryshimet klimatike, inteligjencën artificiale dhe teknologjitë e reja.
Millatoviq tha se përgjigjja ndaj këtyre sfidave nuk duhet të jetë tërheqja nga multilateralizmi, por krijimi i një sistemi ndërkombëtar më efikas.
Një pjesë të veçantë të fjalimit ia kushtoi të rinjve dhe arsimit, duke argumentuar se të rinjtë duhet të jenë partnerë në hartimin e politikave publike.
Ai theksoi gjithashtu rëndësinë e inteligjencës artificiale, duke thënë se teknologjia duhet të mbetet në shërbim të njerëzimit dhe të zhvillohet në përputhje me të drejtat e njeriut.
Në përmbyllje, Millatoviq tha se përgjegjësia e liderëve nuk është vetëm të menaxhojnë të tashmen, por edhe të zgjerojnë mundësitë për gjeneratat e ardhshme.
Ai shprehu shpresën që gjenerata e ardhshme e përfaqësuesve të Malit të Zi në OKB të mund të thotë se vendi e ka përfunduar rrugën evropiane dhe se rajoni ka lënë pas ndarjet e vjetra.
