Presidentja e Komisionit Evropian, Ursula von der Leyen, ka propozuar që Kanadaja të bëhet “anëtari i parë i asociuar” i Bashkimit Evropian, duke bërë thirrje për një rishikim të partneriteteve të BE-së përballë sfidave të reja gjeopolitike dhe ekonomike.
Duke folur në Parlamentin Evropian gjatë fjalimit për Gjendjen e Unionit 2026, Von der Leyen tha se Evropa duhet të rishikojë urgjentisht partneritetet e saj dhe propozoi që së bashku me kryeministrin kanadez Mark Carney të çojë marrëdhëniet BE-Kanada në nivelin më të lartë të mundshëm.
Ajo tha se dëshiron “t’i hapë derën Kanadasë” për një status të tillë, si pjesë e përpjekjeve për të forcuar bashkëpunimin me partnerë të besueshëm në sektorë strategjikë, përfshirë energjinë, mineralet kritike, bateritë, inteligjencën artificiale, teknologjitë kuantike, sigurinë kibernetike dhe sigurinë ekonomike.
Megjithatë, Von der Leyen nuk dha detaje konkrete se çfarë do të përfshinte statusi i “anëtarit të asociuar” apo cilat ndryshime institucionale do të nevojiteshin për zbatimin e tij.
Ajo theksoi se BE-ja duhet të sigurojë furnizimin me lëndë të para kritike, të forcojë pavarësinë energjetike dhe të zhvillojë kapacitetet e veta në teknologjitë e reja, duke bashkëpunuar me partnerë të besueshëm.
Sipas saj, Evropa po ndjek një rrugë më të pavarur dhe po ndërton kapacitete më të mëdha për të mbrojtur sigurinë, furnizimet energjetike dhe interesat e saj ekonomike.
