Shqipëria ka regjistruar 2.38 miliardë euro të ardhura nga shpenzimet e turistëve të huaj në gjashtëmujorin e parë të vitit 2026, duke shënuar një rekord të ri për këtë periudhë.
Krahasuar me të njëjtën periudhë të vitit të kaluar, të ardhurat nga turistët u rritën me 13.4%.
Gjatë gjashtë muajve të parë të vitit, në Shqipëri hynë rreth 5.1 milionë shtetas të huaj, ose 6.2% më shumë se një vit më parë.
Rritja më e shpejtë e të ardhurave krahasuar me numrin e vizitorëve tregon se turistët po shpenzojnë më shumë gjatë qëndrimit në vend.
Shpenzimi mesatar për vizitor u rrit në rreth 470 euro, nga 440 euro në vitin 2025.
Ndërkohë, shqiptarët shpenzuan rreth 1.4 miliardë euro për udhëtime jashtë vendit, 9.5% më shumë në terma vjetorë.
Si rezultat, diferenca mes shpenzimeve të turistëve të huaj në Shqipëri dhe atyre të shqiptarëve jashtë vendit arriti në 957 milionë euro, niveli më i lartë i regjistruar për një gjashtëmujor të parë.
Të dhënat e Bankës së Shqipërisë dhe INSTAT tregojnë se turizmi po luan një rol gjithnjë e më të rëndësishëm në ekonominë shqiptare, jo vetëm përmes rritjes së numrit të vizitorëve, por edhe përmes të ardhurave dhe valutës që sjell në vend.
