Kryeministri izraelit Benjamin Netanyahu deklaroi se një marrëveshje diplomatike me udhëheqjen iraniane nuk është e mundur, ndërsa shprehu mbështetje për fushatën e re të presionit ekonomik të Presidentit amerikan Donald Trump ndaj Teheranit.
Duke folur për një takim të fundit me Trumpin, Netanyahu tha se gjatë bisedës ishte diskutuar mundësia e një zgjidhjeje diplomatike me Iranin, por ai kishte shprehur bindjen se një marrëveshje nuk mund të arrihet me udhëheqjen aktuale iraniane.
Netanyahu ka mbajtur prej kohësh një qëndrim skeptik ndaj diplomacisë me Iranin dhe ka kundërshtuar publikisht marrëveshjen bërthamore të vitit 2015, të ndërmjetësuar gjatë administratës së Barack Obamës.
Megjithatë, ai ka shmangur kritikat publike ndaj Trumpit, i cili ka deklaruar se preferon një zgjidhje të negociuar.
Trump, i cili në fund të shkurtit iu bashkua Izraelit në një sulm të përbashkët ndaj Iranit, pranoi një armëpushim në prill, pas kundërshtimeve të forta ndaj luftës dhe rritjes së ndjeshme të çmimeve të naftës.
Ndërkohë, Trump ka shpallur një fushatë të re presioni ekonomik ndaj Iranit, të cilën e ka cilësuar si “Dita D ekonomike”, me synimin për të goditur më tej ekonominë iraniane, e cila prej vitesh është nën sanksione.
Pavarësisht presionit të shtuar, Trump ka treguar hezitim për rikthimin në një luftë të gjerë, ndërsa shprehet i zhgënjyer nga refuzimi i Teheranit për të pranuar kërkesat e Uashingtonit.
Netanyahu, nga ana tjetër, ka kërkuar prej vitesh një ndërhyrje ushtarake amerikane kundër Iranit.
