Një valë e re dhe e fuqishme e të nxehtit ka përfshirë Evropën, duke sjellë temperatura rekord, zjarre, probleme në furnizimin me energji dhe vështirësi në transport në disa vende të kontinentit.
Italia ka vendosur të gjitha qytetet e saj kryesore nën alarmin më të lartë për nxehtësinë, ndërsa autoritetet kanë paralajmëruar qytetarët të shmangin ekspozimin në diell gjatë orëve më të nxehta të ditës.
Temperaturat kanë kaluar 40 gradë Celsius në disa shtete evropiane, duke detyruar autoritetet të lëshojnë paralajmërime shëndetësore për miliona banorë.
Sipas shkencëtarëve dhe institucioneve përgjegjëse, ngjarje të tilla ekstreme po bëhen gjithnjë e më të shpeshta dhe më intensive si pasojë e ndryshimeve klimatike.
Vala e të nxehtit ka nxjerrë në pah dobësitë e sistemeve të shëndetit publik, prodhimit të energjisë, rrjeteve të transportit dhe infrastrukturës turistike, duke i detyruar qeveritë dhe bizneset të përshtaten me periudha gjithnjë e më të shpeshta të motit ekstrem.
Në Itali, alarmi maksimal për nxehtësinë është shpallur në të gjitha qytetet kryesore, nga Trieste në verilindje deri në Palermo në Siçili.
Të enjten, temperatura arriti në 48 gradë Celsius në zonën e Stacionit Qendror të Napolit, ndërsa në Gorizia u regjistruan 40 gradë Celsius, temperatura më e lartë e regjistruar ndonjëherë në rajonin e Friuli Venezia Giulia.
Edhe vendet e tjera të Evropës Qendrore po përballen me temperatura historike. Sllovakia regjistroi një rekord kombëtar prej 42.2 gradë Celsius, ndërsa niveli jashtëzakonisht i ulët i ujit në lumin Danub detyroi hidrocentralin më të madh të vendit të ndalojë funksionimin e turbinave. Në Austri u regjistrua një temperaturë rekord prej 41.2 gradë Celsius, duke shënuar vlerën më të lartë të matur ndonjëherë në këtë shtet.
Gjermania mbetet në gjendje alarmi për shkak të nivelit të ulët të ujit në lumin Rin, situatë që po ndikon në transportin lumor dhe aktivitetin ekonomik. Ndërkohë, në juglindje të Francës, zjarrfikësit vazhdojnë të qëndrojnë në gatishmëri të lartë nga frika e shpërthimit të vatrave të reja të zjarrit, të favorizuara nga temperaturat e larta dhe erërat e forta.
Edhe Ballkani është përfshirë nga vala e të nxehtit, ku temperaturat kanë arritur deri në 40 gradë Celsius. Në disa vende të rajonit autoritetet po përballen me thatësirë të zgjatur, rrezik të shtuar për zjarre dhe presion mbi sistemet energjetike dhe burimet ujore.
Meteorologët paralajmërojnë se temperaturat e larta pritet të vazhdojnë edhe në ditët në vijim, ndërsa autoritetet në shumë vende evropiane u bëjnë thirrje qytetarëve të shmangin daljet e panevojshme gjatë orëve të pikut, të konsumojnë sa më shumë lëngje dhe të tregojnë kujdes të veçantë për të moshuarit, fëmijët dhe personat me sëmundje kronike.
