Sekretari i Përgjithshëm i OKB-së, Antonio Guterres, ka bërë thirrje për ndërprerjen e menjëhershme të sulmeve shkatërruese ndaj zonave civile dhe infrastrukturës në Rusi dhe Ukrainë, duke dënuar përshkallëzimin e luftimeve dhe pasojat e tyre mbi popullsinë civile.
Në një deklaratë të lexuar nga zëdhënësi i OKB-së, Farhan Haq, Guterres theksoi se sulmet ndaj civilëve dhe objekteve civile përbëjnë shkelje të qarta të së drejtës ndërkombëtare humanitare dhe u bëri thirrje të gjitha palëve në konflikt të respektojnë detyrimet e tyre sipas ligjit ndërkombëtar.
Reagimi i Kombeve të Bashkuara vjen pas një jave të përgjakshme në frontin e luftës, ku një seri sulmesh me raketa ruse në Kiev shkaktuan vdekjen e të paktën 17 personave.
Në të njëjtën kohë, OKB-ja dënoi edhe sulmet me dronë të kryera nga Ukraina ndaj disa rajoneve brenda territorit rus, të cilat gjithashtu kanë shkaktuar viktima.
Përmes zëdhënësit Farhan Haq, Guterres ritheksoi se përshkallëzimi i dhunës po e rëndon edhe më tej krizën humanitare dhe rrezikon jetën e mijëra civilëve në të dyja vendet.
Sipas të dhënave zyrtare të Kombeve të Bashkuara, gjatë vitit 2026 është regjistruar një rritje e ndjeshme e numrit të viktimave civile.
Ndërkohë, lufta që ka hyrë në vitin e saj të pestë vazhdon pa shenja konkrete për një armëpushim apo një marrëveshje paqeje, ndërsa komuniteti ndërkombëtar vijon të bëjë thirrje për ndalimin e luftimeve dhe mbrojtjen e popullsisë civile.
