Në takimin urgjent të ministrave të Brendshëm të Bashkimit Evropian, Italia propozoi krijimin e qendrave të financuara nga BE-ja për përpunimin e kërkesave për azil dhe kthimin e emigrantëve në vende të treta të sigurta, jashtë territorit të Unionit, ku mes vendeve të përmendura është edhe Shqipëria.
Ministri italian Matteo Piantedosi theksoi se BE-ja duhet të veprojë si një bllok i bashkuar për të parandaluar migracionin e parregullt dhe për të kthyer ata që nuk kanë të drejtë të qëndrojnë në Evropë.
Edhe Greqia paraqiti një propozim për pezullimin e përkohshëm të kërkesave për azil dhe kthimin e shpejtë të emigrantëve në raste kur migracioni përdoret si mjet presioni politik.
Nga ana tjetër, Komisioneri Evropian për Çështjet e Brendshme, Magnus Brunner, paralajmëroi se kriza në Ceuta tregoi se migracioni mund të përdoret për të sfiduar aftësinë e reagimit të BE-së.
Takimi u zhvillua në kuadër të zbatimit të Paktit të ri të Migracionit të BE-së.
Ministrat ranë dakord të përqendrohen në forcimin e kontrollit të kufijve dhe bashkëpunimin me vendet e treta, ndërsa shumica e vendeve anëtare vazhdojnë të kundërshtojnë planin e kryeministrit spanjoll Pedro Sánchez për legalizimin e rreth 500 mijë emigrantëve pa dokumente.
Çështja do të rikthehet në diskutim në takimet e ardhshme të ministrave të Brendshëm dhe të Këshillit Evropian në tetor.
