Rreth 60 mijë persona janë urdhëruar të evakuohen, ndërsa zjarret kërcënojnë qytetin Spokane në shtetin e Uashingtonit, thanë zyrtarët lokalë, duke shtuar se flakët kanë shkatërruar rreth 600 ndërtesa, përfshirë shtëpi dhe biznese.
Zjarri në Spokane, i cili përfshin tri vatra të ndara, po kërcënon zonat që janë nën urdhër evakuimi, tha për Reuters shefi i Zjarrfikësve të Spokane, Tom Williams.
Deri të dielën, zjarret kishin përfshirë rreth 2.180 hektarë, sipas ekipit federal për menaxhimin e incidenteve.
Williams tha se flakët ende nuk janë vënë nën kontroll. Zyrtarët njoftuan në një konferencë për media të dielën pasdite se nuk është raportuar për të lënduar apo viktima.
Kryetarja e Bashkisë së Spokane, Lisa Brown, e cilësoi situatën si “fatkeqësinë më të rëndë natyrore me të cilën është përballur ndonjëherë rajoni”. Shumë shtëpi në zonën e prekur kanë mbetur pa energji elektrike.
Ndërkohë, zyrtarët federalë kanë bërë të ditur se më shumë se 100 mijë hektarë tokë po digjen në të gjithë shtetin e Uashingtonit.
Guvernatori i shtetit, Bob Ferguson, tha se kishte biseduar me presidentin amerikan, Donald Trump, dhe kishte kërkuar ndihmë nga Agjencia Federale për Menaxhimin e Emergjencave (FEMA).
Ai gjithashtu ka shpallur gjendjen e jashtëzakonshme në të gjithë shtetin.
