Foto: Qeveria e Malit të Zi / Vlada Crne Gore
Mali i Zi është vendi kandidat për anëtarësim në Bashkimin Evropian që po përmbush më shpejt kushtet dhe kriteret për anëtarësim, ka deklaruar zëvendëskryeministri dhe ministri i Punëve të Jashtme të Luksemburgut, Gzavije Betel.
Gjatë një konference të përbashkët për media me homologun e tij malazez, Ervin Ibrahimoviq, në kuadër të vizitës zyrtare në Mal të Zi, Betel vlerësoi përparimin e vendit në rrugën evropiane dhe tha se mbështetja e Luksemburgut bazohet në rezultatet konkrete dhe meritat e arritura.
“Ju keni përmbushur gjithçka që keni premtuar. E keni zgjedhur rrugën drejt BE-së, e dini se nuk është rrugë e lehtë, por është rruga e duhur”, tha Betel, duke përgëzuar institucionet malazeze për punën e bërë.
Ai theksoi se procesi i zgjerimit të BE-së nuk është më vetëm një ëndërr, por një perspektivë reale për vendet që përmbushin detyrimet e tyre.
Sipas tij, Mali i Zi aktualisht është në pozitën më të avancuar ndër vendet kandidate.
“Kur shikoj të gjitha faktet, sipas mendimit tim, ju jeni më të shpejtët në përmbushjen e të gjitha kritereve nga të gjitha shtetet kandidate”, deklaroi ministri luksemburgas.
Betel tha se Mali i Zi nuk po merr privilegje, por mbështetja evropiane bazohet në rezultatet e dokumentuara dhe përparimin e bërë në procesin e reformave.
Ai gjithashtu vlerësoi forcimin e marrëdhënieve mes dy vendeve dhe bëri thirrje për thellimin e bashkëpunimit ekonomik, veçanërisht përmes kontakteve më të mëdha mes komuniteteve të biznesit.
Ministri i Punëve të Jashtme të Malit të Zi, Ervin Ibrahimoviq, falënderoi Luksemburgun për mbështetjen e vazhdueshme ndaj integrimit evropian të vendit, duke theksuar se marrëdhëniet mes dy shteteve bazohen në besim, vlera të përbashkëta evropiane dhe aleancën në kuadër të NATO-s.
Ibrahimoviq tha se gjatë takimit janë diskutuar çështje të rëndësishme dypalëshe, bashkëpunimi rajonal, procesi i integrimit në BE, si dhe sfidat globale.
Ai theksoi se të dy vendet mbështesin forcimin e NATO-s dhe vazhdimin e ndihmës për Ukrainën.
Sipas Ibrahimoviqit, ekziston potencial i madh për rritjen e bashkëpunimit ekonomik, veçanërisht në sektorët e energjetikës, bujqësisë dhe turizmit.
Ai bëri të ditur se Mali i Zi synon të rrisë numrin e turistëve nga Luksemburgu dhe të organizojë një forum biznesi mes kompanive të të dy vendeve.
Ibrahimoviq informoi gjithashtu homologun e tij për angazhimin e Malit të Zi në sundimin e ligjit, luftën kundër krimit të organizuar dhe korrupsionit, duke theksuar se vendi është i përkushtuar për përfundimin me sukses të rrugës së tij drejt Bashkimit Evropian.
