Foto: EU
Ambasadori i Bashkimit Evropian në Mal të Zi, Johann Sattler, deklaroi se ndryshimet në Kushtetutë dhe reforma zgjedhore janë hapa vendimtarë në rrugën e Malit të Zi drejt anëtarësimit në BE.
Ai e vlerësoi si sinjal inkurajues marrëveshjen e arritur në Kuvend dhe mbështetjen prej 74 votash për nisjen e procedurës së ndryshimeve kushtetuese, duke theksuar se propozimet janë shqyrtuar nga Bashkimi Evropian, Komisioni Evropian dhe Komisioni i Venecias dhe janë plotësisht në përputhje me standardet evropiane.
Sattler nënvizoi se ndryshimet kushtetuese janë vetëm një pjesë e reformave të nevojshme.
Sipas tij, Mali i Zi duhet të përfundojë edhe reformën e legjislacionit zgjedhor, duke përfshirë rritjen e transparencës së zgjedhjeve, zbatimin e rekomandimeve të OSBE-së, ndryshimet teknike për zgjedhjen e presidentit dhe rregullimin e financimit të partive politike.
Ai shtoi se pret që këto reforma të përfundojnë brenda këtij muaji, gjë që do t’i mundësonte Malit të Zi mbylljen e kapitujve përkatës të negociatave me BE-në, duke theksuar se reforma zgjedhore është një proces i vazhdueshëm që kërkon përmirësime të vazhdueshme.
