Foto: Qeveria e Malit të Zi / Vlada Crne Gore
Gjatë prezantimit të dokumentit joformal të Komisionit Evropian për sundimin e ligjit, negociatori kryesor i Malit të Zi me BE-në Predrag Zenoviq vlerësoi se dokumenti është shumë pozitiv dhe konfirmon se objektivi i vendit për mbylljen e kapitujve 23 dhe 24 është real dhe i arritshëm.
Ai theksoi se Mali i Zi ka bërë përparim në të gjitha fushat e sundimit të ligjit dhe se institucionet po forcohen, duke krijuar një balancë të qëndrueshme mes reformave teknike dhe atyre të drejtësisë.
Sipas tij, kjo tregon se vendi është në rrugën e duhur për të vijuar integrimin evropian dhe për të mbyllur kapitujt e negociatave në periudhën e ardhshme.
Zyrtarja shtetërore në Ministrinë e Çështjeve Evropiane Bilana Papoviq deklaroi se ky është një nga vlerësimet më pozitive të viteve të fundit për progresin e Malit të Zi në fushën e sundimit të ligjit. Ajo theksoi se shumica e reformave kryesore janë nisur dhe institucionet po tregojnë rezultate konkrete, sidomos në drejtësi, luftën kundër korrupsionit dhe krimit të organizuar.
Papoviq shtoi se progres është shënuar edhe në forcimin e gjyqësorit, funksionimin e Gjykatës së Lartë, Prokurorisë së Shtetit dhe Prokurorisë Speciale, si dhe në përmirësimin e transparencës dhe uljen e ngarkesës së lëndëve.
Ajo gjithashtu vlerësoi përparimin në të drejtat themelore, përfshirë luftën kundër diskriminimit dhe mbrojtjen e grupeve të ndryshme shoqërore.
Megjithatë, ajo theksoi se Kuvendi duhet të marrë përgjegjësinë për pjesën e tij të detyrimeve, veçanërisht për ndryshimet kushtetuese dhe emërimet në gjyqësor, të cilat janë thelbësore për mbylljen e kapitujve të negociatave.
Zyrtarë të tjerë të përfshirë në proces vlerësuan gjithashtu përparimin në kapitujt 23 dhe 24, duke theksuar rritjen e bashkëpunimit ndërinstitucional, rezultate më të mira në luftën kundër krimit të organizuar dhe forcimin e kapaciteteve të sistemit të sigurisë.
