Foto: predsjednik.me
Presidenti i Malit të Zi, Jakov Millatoviq, deklaroi se vendi është i gatshëm të bëhet anëtari i 28-të i Bashkimit Evropian deri në vitin 2028.
Ai i bëri këto komente gjatë Samitit të krerëve të shteteve dhe qeverive të Procesit të Bashkëpunimit në Evropën Juglindore (SEECP), i mbajtur në Sofje të Bullgarisë.
Duke iu drejtuar pjesëmarrësve në seancën plenare, Millatoviq theksoi se integrimi evropian mbetet korniza më e rëndësishme për stabilitetin, sigurinë dhe zhvillimin e rajonit.
Ai nënvizoi se përkushtimi i Malit të Zi ndaj rrugës evropiane është i fortë dhe i pakthyeshëm.
Sipas presidentit të Malit të Zi, Tregu i Përbashkët Rajonal, Agjenda e Gjelbër, Agjenda Digjitale dhe Strategjia SEE2030 përfaqësojnë mekanizma të rëndësishëm për forcimin e bashkëpunimit dhe zhvillimit në Evropën Juglindore.
Millatoviq vlerësoi gjithashtu se samiti BE–Ballkani Perëndimor, i mbajtur më 5 qershor në Tivat, ka forcuar besimin ndërmjet Bashkimit Evropian dhe vendeve të Ballkanit Perëndimor, duke i dhënë një shtysë të re procesit të zgjerimit.
“Mali i Zi është i gatshëm të kontribuojë, i gatshëm të udhëheqë dhe i gatshëm t’i bashkohet Bashkimit Evropian si anëtari i 28-të deri në vitin 2028”, deklaroi Millatoviq.
Ai shtoi se Mali i Zi, si vendi kandidat më i avancuar për anëtarësim në BE, do të vazhdojë të dëshmojë përmes reformave dhe rezultateve konkrete se zgjerimi i Bashkimit Evropian mbetet një proces i realizueshëm.
