Foto: Qeveria e Malit të Zi / Vlada Crne Gore
Ministri i Shëndetësisë i Malit të Zi, Vojisllav Shimun, ka deklaruar se në sistemin shëndetësor të Malit të Zi është nisur një nga reformat më të mëdha të dekadave të fundit, që përfshin hartimin e rreth 3.000 protokolleve, udhëzimeve dhe standardeve kombëtare.
Sipas tij, qëllimi kryesor i kësaj reforme është që të sigurohet i njëjti cilësi e shërbimit shëndetësor në të gjitha institucionet shëndetësore në vend, pavarësisht qytetit apo rajonit.
Kjo pritet të ulë gabimet mjekësore dhe të rrisë sigurinë e pacientëve.
Shimun tha se për vetëm dy muaj janë miratuar rreth 140 protokolle nga fusha të ndryshme mjekësore, ndërsa edhe 160 të tjera janë përgatitur dhe pritet të miratohen së shpejti.
Në total, deri tani janë përpunuar rreth 300 dokumente. Këto protokolle mbulojnë fusha si gjinekologjia, kirurgjia, pediatria, mjekësia urgjente, psikiatria dhe onkologjia.
Ato do të vendosen në spitale dhe ambulanca në formë udhëzimesh të qarta (algoritme) për mjekët.
Ministri theksoi se zbatimi i tyre do të jetë i detyrueshëm dhe se mosrespektimi i protokolleve do të sjellë përgjegjësi për ofruesit e shërbimeve shëndetësore.
Ai gjithashtu njoftoi se numri i mjekëve në sistemin publik është rritur dhe se kushtet më të mira të punës dhe mundësitë për specializime kanë ndihmuar në uljen e largimit të mjekëve nga vendi.
Megjithatë, ai theksoi si problem kryesor shpërndarjen e pabarabartë të mjekëve, veçanërisht në veri të vendit.
Sa i përket listave të pritjes, Shimun tha se në Spitalin e Fëmijëve është vendosur një sistem i ri rezervimesh për vizita, i cili rrit transparencën dhe aksesin në termine, duke ndjekur modelin e Qendrës Klinike të Malit të Zi.
