Foto: predsjednik.me
Presidenti i Malit të Zi, Jakov Millatoviq, gjatë takimit të Koalicionit Evropian kundër Drogave në Jerevan, theksoi se lufta kundër krimit të organizuar kërkon institucione të forta dhe bashkëpunim ndërkombëtar.
Ai vuri në dukje nevojën urgjente për miratimin e një ligji antimafia dhe forcimin e kontrollit të rrjedhave financiare.
Millatoviq falënderoi Francën për ndihmën në forcimin e kapaciteteve për luftën kundër krimit të organizuar, duke përfshirë edhe përdorimin e të dhënave nga komunikimet “Sky”, të cilat kanë ndihmuar në zbardhjen e rrjeteve kriminale.
Ai theksoi se në të kaluarën disa persona brenda sistemit shtetëror në Mal të Zi kanë qenë të përfshirë në struktura që duhej t’i luftonin krimet, prandaj forcimi i integritetit të institucioneve është thelbësor.
Presidenti gjithashtu shprehu mirënjohje ndaj Italisë për mbështetjen në përgatitjen e ligjit antimafia, i cili synon gjurmimin dhe konfiskimin e pasurisë së fituar në mënyrë të paligjshme.
Sipas tij, një pjesë e madhe e kësaj pasurie ndodhet jashtë vendit, gjë që e bën të domosdoshme bashkëpunimin ndërkombëtar.
Në takim u diskutuan edhe sfida të tjera si siguria e porteve, hetimet financiare dhe rritja e kërcënimit nga drogat sintetike, duke theksuar nevojën për koordinim më të madh mes shteteve dhe shkëmbim informacioni.
Millatoviq theksoi se krimi i organizuar nuk njeh kufij, prandaj as përgjigjja nuk mund të jetë e kufizuar vetëm në shtete individuale.
Ai theksoi se Mali i Zi do të vazhdojë të forcojë institucionet dhe kornizën ligjore, duke qenë partner i besueshëm në luftën kundër krimit të organizuar dhe për sigurinë e qytetarëve.
