Foto: Qeveria e Malit të Zi / Vlada Crne Gore
Në Adria Future Summit në Tivat u mbajt një panel i dedikuar presidencës së Malit të Zi në Procesin e Berlinit, ku u vlerësua se kjo iniciativë mbetet një platformë kyçe për forcimin e bashkëpunimit rajonal dhe afrimin e vendeve të Ballkanit Perëndimor me Bashkimin Evropian.
Nën moton “Rajoni në lëvizje, bartësit e ndryshimeve”, pjesëmarrësit theksuan se presidenca malazeze paraqet një mundësi të rëndësishme për të përshpejtuar bashkëpunimin dhe integrimin rajonal.
Koordinatorja kombëtare e Procesit të Berlinit, Milica Perishiq, tha se Mali i Zi synon të forcojë dialogun dhe bashkëpunimin mes vendeve të rajonit në rrugën drejt BE-së.
Ambasadori gjerman në Mal të Zi, Peter Felten, u shpreh se “Mali i Zi sjell optimizëm në Berlin” dhe vlerësoi përparimin e vendit në procesin e integrimit evropian, duke theksuar se misioni i Procesit të Berlinit është përgatitja e rajonit për anëtarësim në BE përmes rezultateve konkrete për qytetarët.
Ambasadorja britanike Don Meken theksoi se forca kryesore e procesit është ruajtja e fokusit në përparim të përbashkët, duke lidhur dialogun politik me rezultate konkrete dhe duke siguruar vazhdimësi në punën e vendeve që e udhëheqin atë.
Po ashtu, u theksua rëndësia e zhvillimit të sektorit privat, investimeve në kapitalin njerëzor, teknologji dhe prodhim, si dhe roli i diasporës në zhvillimin ekonomik të rajonit.
Në fund, pjesëmarrësit ranë dakord se Procesi i Berlinit mbetet një platformë e rëndësishme për integrimin rajonal, reformat dhe përfitime konkrete për qytetarët, me fokus në rritje ekonomike, konkurrueshmëri, siguri dhe tranzicion të gjelbër.
