Foto: Boris Pejović
Agjencia për Siguri Kombëtare e Malit të Zi ka bërë të ditur se, në kontekstin e tensioneve në Lindjen e Mesme, janë rekomanduar masa të shtuara sigurie dhe kontroll i plotë i kufijve, me qëllim mbrojtjen e qytetarëve dhe personave që qëndrojnë në vend për arsye të ndryshme.
Sipas ASK-së, situata ndërkombëtare, përfshirë përplasjet mes Iranit dhe vendeve të tjera të rajonit, si dhe aktiviteti i organizatave terroriste si ISIS dhe Al-Kaeda, mund të ndikojë edhe në rajon përmes propagandës online, dezinformimit dhe nxitjes së individëve apo grupeve të vogla për sulme të mundshme terroriste.
Në këtë kontekst, ekziston shqetësimi se migrimet mund të keqpërdoren për qëllime terroriste ose lidhje me rrjete kriminale që sigurojnë armë, ndaj rekomandohet rritja e kontrolleve kufitare.
Agjencia për Siguri Kombëtare thekson gjithashtu se, ndonëse në Mal të Zi nuk është vërejtur rritje e tensioneve fetare, rreziku nuk mund të përjashtohet plotësisht. Mund të ketë incidente të vogla ndaj komuniteteve hebraike ose ndaj interesave të vendeve si Izraeli dhe SHBA në rajonin e Ballkanit Perëndimor.
Në përgjithësi, institucionet e sigurisë rekomandojnë vigjilencë të shtuar dhe masa parandaluese për të ruajtur stabilitetin dhe sigurinë publike në vend.
