Foto: RTMZ
Në Mal të Zi aktualisht punojnë vetëm tre inspektorë për peshkimin, të cilët megjithatë kanë kryer një numër të madh aktivitetesh kontrolli gjatë vitit të kaluar.
Ata kanë realizuar mbi 900 inspektime në terren dhe kanë lëshuar 118 urdhra për kundërvajtje, me një vlerë totale prej rreth 66.500 euro gjobash.
Gjithashtu, gjatë kontrolleve janë sekuestruar rreth 700 kilogramë peshk i kapur në mënyrë të paligjshme.
Peshkimi ilegal vazhdon të mbetet një problem serioz në Mal të Zi dhe, sipas autoriteteve, nuk është eliminuar ende pavarësisht kontrolleve të vazhdueshme.
Zonat më të prekura janë Liqeni i Shkodrës, si dhe pjesë të caktuara të bregdetit si Valdanosi.
Inspektori i peshkimit Ivan Knezheviq ka deklaruar se peshkimi ilegal dëmton ndjeshëm fondin e peshkut si në det ashtu edhe në ujërat e brendshme.
Ai shpjegoi se inspektorët punojnë sipas Ligjit për peshkimin detar dhe Ligjit për peshkimin në ujërat e ëmbla, dhe se puna e tyre ndahet në dy pjesë kryesore: kontrolli në ujë dhe kontrolli i tregut të produkteve të peshkut.
Sipas tij, shkeljet më të shpeshta ndodhin me përdorimin e mjeteve të ndaluara si pajisje elektrike, gjeneratorë, dinamit dhe eksplozivë.
Knezheviq theksoi se tre inspektorët ekzistues nuk janë të mjaftueshëm për të mbuluar të gjitha zonat dhe se nevojitet staf shtesë dhe trajnim më i mirë.
Ai shtoi se, megjithëse ka bashkëpunim me policinë kufitare, ndërmarrjet publike dhe rojet e parqeve kombëtare, kapacitetet mbeten të kufizuara. P
ër Liqenin e Shkodrës, për shembull, menaxhimi është i ndarë edhe me klube sportive të peshkimit dhe shërbime roje. Në kuadër të reformave ligjore dhe përafrimit me Bashkimin Evropian, Mali i Zi ka miratuar ligje të reja për peshkimin detar, peshkimin në ujërat e ëmbla dhe organizimin e tregut të peshkut.
Një nga risitë kryesore është sistemi i gjurmimit të anijeve përmes Qendrës së Monitorimit të Peshkimit, ku të gjitha anijet komerciale do të monitorohen për aktivitetin e tyre.
Sa i përket rregullave të sezonit të peshkimit, është në fuqi ndalimi i peshkimit të krapit nga 15 marsi, si dhe ndalimi i shitjes së tij gjatë periudhës së ndalimit të peshkimit.
Në rastet e shkeljeve, ligjet e reja parashikojnë gjoba më të rënda: për personat fizikë në det nga 900 deri në 2.000 euro, ndërsa për personat juridikë nga 3.000 deri në 20.000 euro. Për peshkimin në ujërat e ëmbla, gjobat për individët variojnë nga 1.000 deri në 2.000 euro.
Sipas inspektorit Knezheviq, edhe pse ka ende raste të peshkimit ilegal dhe ankesa për tregun e paligjshëm të peshkut, situata ka shënuar përmirësime të lehta falë punës së inspektorëve, institucioneve të tjera dhe qytetarëve që raportojnë shkeljet.
