Foto: Qeveria e Malit të Zi / Vlada Crne Gore
Aeroporti i Podgoricës është forcuar me vendosjen e bazës së kompanisë ajrore low-cost Wizz Air, një zhvillim që sipas kryeministrit Millojko Spajiq dhe drejtorit ekzekutiv të Aeroporteve të Malit të Zi, Roko Toliq, tregon besim në vend dhe hap mundësi të reja për zhvillimin e turizmit dhe lidhjeve ajrore.
Kryeministri Spajiq theksoi se kjo bazë do të mundësojë lidhje më të mira me Evropën, ndërsa Toliq vlerësoi se bashkëpunimi me institucionet është kyç për suksesin e projektit.
Sipas kryeministrit Spajiq, hapja e 17 destinacioneve të reja do të sjellë linja të reja ajrore, do të rrisë numrin e turistëve dhe do të ndikojë pozitivisht në ekonomi. Ai e cilësoi këtë si një hap të rëndësishëm në përmirësimin e lidhjes ajrore të vendit.
Avioni i bazuar në Podgoricë është një Airbus A321neo me kapacitet prej 239 pasagjerësh, i njohur për efikasitet të lartë në konsum të karburantit dhe emetime më të ulëta.
Fluturimi i parë komercial u realizua në orën 06:15 të mëngjesit, kur pasagjerët u nisën nga Podgorica drejt Suedisë, duke shënuar fillimin zyrtar të operimit të bazës.
Sipas autoriteteve, ky zhvillim pritet të rrisë numrin e fluturimeve, të përmirësojë lidhjet ajrore dhe të ndikojë në uljen e çmimeve të biletave, duke forcuar më tej praninë e Wizz Air në tregun e Malit të Zi.
