Foto: Qeveria e Malit të Zi / Vlada Crne Gore
Ambasadori i BE-së në Mal të Zi, Johan Sattler, deklaroi se është thelbësore të ruhet një mbështetje e fortë dhe e gjerë politike për reformat, në mënyrë që të përshpejtohet integrimi i vendit në Bashkimin Evropian përmes një qasjeje të qëndrueshme dhe gjithëpërfshirëse.
Këto komente u bënë gjatë një konference për media ku Qeveria e Malit të Zi prezantoi programin dhe prioritetet e kryesimit të Procesit të Berlinit.
U theksua se falë këtij procesi, vendet e Ballkanit Perëndimor janë sot më të lidhura dhe më pranë BE-së.
Përfaqësuesja e Qeverisë, Milica Perishiq, bëri të ditur se Mali i Zi merr kryesimin në një vit shumë të rëndësishëm ndërkombëtarisht, duke planifikuar rreth 25 aktivitete, përfshirë 12 takime në nivel ministror dhe një samit të liderëve në tetor.
Qëllimi është që vendi të dëshmojë rol aktiv dhe përgjegjës në rajon, duke sjellë rezultate konkrete.
Prioritetet kryesore përfshijnë forcimin e bashkëpunimit rajonal, përfitime të prekshme për qytetarët dhe përcaktimin e drejtimit të ardhshëm të procesit.
Ambasadori gjerman, Peter Felten, e cilësoi vitin 2026 si shumë të rëndësishëm dhe përgëzoi përgatitjet, ndërsa ambasadorja britanike, Dawn McKen, theksoi rëndësinë e vazhdimit të reformave dhe e cilësoi Malin e Zi si partner të besueshëm.
Në fund, u nënvizua se bashkëpunimi rajonal dhe Procesi i Berlinit mbeten faktorë kyç për zhvillimin ekonomik, investimet dhe integrimin në tregun e përbashkët evropian, ndërsa u prezantua edhe motoja e kryesimit “Rajoni në lëvizje. Pronarët e ndryshimit”, që simbolizon progresin dhe afrimin drejt BE-së.
