Izraeli dhe Irani kryen sulme të reja ndaj njëri-tjetrit të premten, një ditë pasi Teherani goditi një rafineri nafte izraelite dhe pasi presidenti amerikan, Donald Trump, e paralajmëroi Izraelin kundër sulmeve të mëtejshme në një fushë gazi iraniane në det të hapur, të përbashkët me Katarin.
Izraeli goditi Teheranin, duke synuar “infrastrukturën e regjimit terrorist iranian”, tha ushtria në një deklaratë të shkurtër pa dhënë më shumë detaje.
Irani lëshoi një breshëri raketash drejt Izraelit, njoftoi ushtria izraelite, duke bërë që të aktivizoheshin sirenat e alarmit në Tel Aviv, ndërsa shpërthimet nga sistemet e mbrojtjes ajrore u dëgjuan në të gjithë qytetin.
Lufta kundër Iranit ka vrarë mijëra njerëz, kryesisht në Iran dhe Liban, është përhapur në të gjithë Lindjen e Mesme dhe ka goditur ekonominë globale që kur SHBA-të dhe Izraeli nisën sulmet e tyre të përbashkëta më 28 shkurt.
Emiratet e Bashkuara Arabe raportuan gjithashtu një “kërcënim me raketa” herët të premten, ndërsa myslimanët nisën të festonin Fitër Bajrami, që shënon fundin e muajit të shenjtë të Ramazanit.
Kuvajti njoftoi se një rafineri nafte në shtetin e Gjirit u godit nga një sulm me dron.
Sulmet e fundit vijnë pas disa ditësh goditjesh iraniane ndaj infrastrukturës energjetike rajonale, të cilat kanë tronditur tregjet globale.
Çmimet e energjisë u rritën sërish të enjten pasi Irani iu përgjigj një sulmi izraelit mbi një fushë të madhe gazi, duke goditur qytetin industrial Ras Laffan në Katar, që përpunon rreth një të pestën e gazit natyror të lëngshëm në botë, duke shkaktuar dëme që mund të kërkojnë vite për t’u riparuar.
Porti kryesor i Arabisë Saudite në Detin e Kuq, ku janë devijuar disa eksporte për të shmangur Ngushticën e Hormuzit, e cila është mbyllur, u sulmua gjithashtu të enjten.
Megjithatë, çmimet e naftës ranë të premten, pasi vendet perëndimore dhe Japonia ofruan ndihmë për sigurimin e kalimit të anijeve përmes ngushticës, ndërsa SHBA-të ndërmorën hapa për të rritur prodhimin e naftës.
