Përmbytjet e shkaktuara nga Stuhia Leonardo goditën Gadishullin Iberik të mërkurën, duke detyruar mijëra njerëz të evakuohen, duke mbyllur shkollat dhe duke anuluar trenat.
Në Portugali, një burrë në të 60-at humbi jetën pasi u rrëmbye nga rryma ndërsa përpiqej të kalonte me makinë një zonë të përmbytur nga stuhia në juglindje të vendit, raportoi autoriteti kombëtar i mbrojtjes civile.
Në Spanjë, agjencia meteorologjike AEMET vendosi pjesë të rajonit jugor të Andaluzisë nën alarmin më të lartë, atë të kuq, për shkak të reshjeve “të jashtëzakonshme”, duke paralajmëruar për përmbytje dhe rrëshqitje toke.
Zyrtarët e emergjencave thanë në një konferencë për shtyp se situata ishte “shumë shqetësuese” në komunën malore të Grazalemës. Kjo zonë regjistroi më shumë se 40 centimetra shi në vetëm 24 orë, “gjithçka që Madridi zakonisht regjistron për një vit të tërë”.
Rreth 3,500 njerëz u evakuuan në Andaluzi dhe qindra ushtarë u angazhuan për të ndihmuar shërbimet e shpëtimit. Të gjitha shkollat në Andaluzi u mbyllën, përveç atyre në provincën më lindore të rajonit, Almeria.
Pothuajse të gjithë trenat periferikë, rajonalë dhe ata të distancave të gjata u anuluan, pa mundësi për shërbime zëvendësuese të autobusëve për shkak të gjendjes së rrugëve, shumë prej të cilave ishin të mbyllura.
Stuhia Leonardo vetëm sa e rëndoi situatën në Portugali, e cila ishte tronditur tashmë nga stuhia Kristin javën e kaluar, që la pas të paktën pesë të vdekur, qindra të plagosur dhe dhjetëra e mijëra klientë pa energji elektrike.
Shërbimet e emergjencës u përballën me më shumë se 3,300 incidente që nga e diela, kryesisht për shkak të përmbytjeve, rënies së pemëve dhe rrëshqitjeve të dheut.
Ekspertët paralajmërojnë se situata do të vazhdojë të përkeqësohet gjatë ditëve në vijim dhe deri në fillimin e javës tjetër.
