Foto: KE
Nënkryetarja e Komisionit Evropian për sovranitet teknologjik, siguri dhe demokraci, Henna Virkkunen, deklaroi se Komisioni Evropian është i vetëdijshëm për vështirësitë me të cilat po përballen punëtorët e transportit pas zbatimit të sistemit të ri të hyrjes dhe daljes në Zonën Shengen.
Ajo theksoi se po shqyrtohet mundësia e rritjes së fleksibilitetit në strategjinë e vizave, pa rrezikuar sigurinë.
Virkkunen sqaroi se sistemi i ri nuk ka ndryshuar rregullat për kohëzgjatjen e qëndrimeve afatshkurtra pa viza, por pranoi se disa kategori profesionale po hasin sfida praktike.
Punëtorët ndërkufitarë që kalojnë çdo ditë kufirin tashmë gëzojnë përjashtime dhe lehtësi, ndërsa situata është më komplekse për shoferët e kamionëve. Si grupe të tjera të prekura, ajo përmendi sportistët dhe artistët që udhëtojnë për turne.
Sipas saj, këto çështje janë identifikuar dhe po trajtohen në kuadër të strategjisë së re të vizave të BE-së, me synim gjetjen e zgjidhjeve më fleksibile që balancojnë lëvizshmërinë dhe sigurinë.
