Bashkimi Evropian dhe India arritën sot një marrëveshje të tregtisë së lirë, duke krijuar një treg prej rreth 2 miliardë banorësh, ekuivalent me 25% të PBB-së globale, i cili është quajtur “nëna e të gjitha marrëveshjeve”.
Pas pothuajse 20 vitesh bllokimi midis Brukselit dhe Nju Delhit, të dyja palët ndërmorën hapin e fundit në një përpjekje për t’iu përgjigjur politikës tarifore të Presidentit të SHBA- së Donald Trump dhe eksporteve masive të produkteve kineze.
Sipas Komisionit Evropian, i cili ka kompetencën ekskluzive për të negociuar marrëveshje tregtare, tregtia totale midis BE-së dhe Indisë (mallra dhe shërbime) vlerësohet në më shumë se 180 miliardë euro në vit, duke mbështetur pothuajse 800,000 vende pune në BE.
Kjo marrëveshje pritet të dyfishojë eksportet e mallrave të BE-së në Indi deri në vitin 2032, duke eliminuar ose ulur tarifat për eksportet e mallrave të BE-së.
Në përgjithësi, uljet e tarifave do të kursejnë rreth 4 miliardë euro në vit në detyrime për produktet evropiane.
Siç thotë Komisioni, “kjo është hapja më ambicioze tregtare që India i ka dhënë ndonjëherë një partneri tregtar. Do t’u japë një avantazh të konsiderueshëm konkurrues sektorëve kryesorë industrialë dhe agro-ushqimorë të BE-së, duke u ofruar kompanive evropiane akses të privilegjuar në vendin më të populluar në botë me 1.45 miliardë banorë dhe ekonominë kryesore me rritjen më të shpejtë.”
