Foto: Qeveria e Malit të Zi / Vlada Crne Gore
Kryeministri i Malit të Zi, Millojko Spajiq, u takua sot në Davos me Komisioneren Evropiane për Zgjerim, Marta Kos, e cila gjatë bisedimeve njoftoi se vizita zyrtare në Malin e Zi do të zhvillohet tashmë në muajin shkurt.
Në takim, u shpreh kënaqësi e ndërsjellë për ritmin e reformave të Malit të Zi dhe realizimin e masave dhe projekteve nga Plani i Rritjes, si dhe u njoftua vazhdimi i mbylljes së kapitujve negociues javën e ardhshme.
Sipas njoftimit nga Kabineti i Kryeministrit, bëhet fjalë për kapitullin 32 – Mbikëqyrja Financiare, që është nën përgjegjësinë e Ministrisë së Financave. Kryeministri Spajiq dhe Komisionerja Kos ranë dakord se këtë vit është e rëndësishme përkushtimi i plotë i Malit të Zi dhe Bashkimit Evropian që procesi negociues të përfundojë siç është planifikuar, do të thotë deri në fund të vitit 2026.
Kryeministri bëri të ditur se ekipet negociuese malazeze po punojnë me përkushtim mbi secilin nga 21 kapitujt e mbetur për mbyllje, dhe në këtë drejtim do të organizohen edhe seanca të jashtëzakonshme të parlamentit.
Një fokus i veçantë, siç u theksua gjatë takimit, është mbi kapitujt 23 dhe 24, ku po punohet vazhdimisht mbi përfundimin e procesit të emërimeve në drejtësi.
Spajiq theksoi se Mali i Zi këtë vit, ndërsa shënon 20 vjetorin e rikthimit të pavarësisë, ka një sërë aktivitetesh ndërkombëtare – kryeson Procesin e Berlinit, Fondin për Ballkanin Perëndimor dhe Komitetin e Ministrave të Këshillit të Evropës, dhe më 5 qershor do të jetë edhe nikoqir i Samitit Bashkimi Evropian – Ballkani Perëndimor.
Gjithashtu, u theksua rëndësia e dhënies së një sinjali të qartë politik nga BE-ja për rajonin, për të ruajtur besueshmërinë dhe matshmërinë e procesit të zgjerimit.
“Në këtë kuadër, siç u konkludua, Mali i Zi mund të llogarisë në një dialog dhe mbështetje të vazhdueshme dhe intensive nga BE-ja dhe shtetet anëtare në zbatimin e reformave dhe përshpejtimin e procesit të mbylljes së kapitujve, dhe me përpjekje të përbashkëta Mali i Zi do të jetë një shembull i suksesshëm i integrimit evropian në Ballkanin Perëndimor,” thuhet në njoftim.
