Foto: Ministria e Punëve Evropiane
Ministria e Punëve Evropiane e Malit të Zi organizoi prezantimin dhe konsultimet mbi Projektin e Programit të Anëtarësimit të vendit në Bashkimin Evropian për periudhën 2026–2027.
Takimi përfshiu përfaqësues të Komitetit për Integrime Evropiane, strukturave negociuese dhe organizatave joqeveritare, duke ofruar një mundësi për diskutime mbi përfundimin sa më cilësor të dokumentit strategjik.
Programi i Anëtarësimit përmban detyrimet për vitet 2026 dhe 2027, duke përfshirë një numër të konsiderueshëm aktesh ligjore dhe nënligjore që lidhen me mbylljen e kapitujve negociues.
Nga gjithsej 564 akte, 122 lidhen drejtpërdrejt me mbylljen e kapitujve, duke përfshirë 22 akte strategjike, 48 ligje dhe 52 nënligje.
Prioritet i qeverisë është përmbushja e këtyre detyrimeve në gjysmën e parë të vitit 2026, për të siguruar përfundimin e të gjithë kapitujve deri në fund të vitit.
Dokumenti është bazuar në analizën e 2,625 aktet e BE-së dhe ndan qartë detyrimet që janë kusht për mbylljen e kapitujve nga ato që janë pjesë e harmonizimit të zakonshëm me ligjin evropian.
Seksioni i Bujqësisë dhe Peshkimit prezantoi statistikat mbi numrin e detyrimeve sipas kapitujve dhe institucioneve, duke evidentuar se më shumë detyrime kanë Ministria e Bujqësisë (94), Administrata për Sigurinë Ushqimore (80) dhe Ministria e Financave (62).
Pjesëmarrësit nga sektori civil treguan interes për progresin e vitit të kaluar, procedurat e miratimit të akteve urgjente, ndryshimet kushtetuese dhe çështjet e identitetit gjinor bazuar në vetëpërcaktim.
