Kryediplomatja e Bashkimit Evropian, Kaja Kallas, ka sugjeruar se gjendja e zymtë e çështjeve globale mund të jetë një “moment i mirë” për të filluar të pish.
Shefja e politikës së jashtme të BE-së e bëri këtë koment gjatë një takimi privat me udhëheqësit e Parlamentit Evropian, të mërkurën, sipas Politico.
Duke folur në Konferencën e Presidentëve – e cila mbledh eurodeputetët që drejtojnë grupet politike të Parlamentit Evropian – Kallas bëri shaka duke thënë se, ndonëse nuk konsumon shumë alkool, zhvillimet aktuale botërore mund ta shtyjnë drejt tij. Sipas raportimeve, atmosfera në takim ishte pesimiste.
Krizat globale që po zhvillohen me shpejtësi e kanë vënë në vështirësi Bashkimin Evropian, i cili vepron më ngadalë për shkak të nevojës për koordinim mes 27 shteteve anëtare.
Komentet e Kallas erdhën në një kohë kur ministrat e jashtëm të Groenlandës dhe Danimarkës po zhvillonin bisedime me Zëvendëspresidentin e SHBA-së, JD Vance, dhe Sekretarin e Shtetit, Marco Rubio, mes kërcënimeve të Presidentit amerikan Donald Trump për të marrë kontrollin e ishullit.
Kjo situatë i është shtuar listës gjithnjë e më të gjatë të sfidave me të cilat përballet BE-ja, përfshirë luftën në Ukrainë, operacionet amerikane në Venezuelë dhe kryengritjet masive në Iran.
Tensionet janë rritur gjithashtu pasi Trump e përjashtoi Evropën nga negociatat e paqes për Ukrainën.
Të mërkurën, ai deklaroi se Presidenti ukrainas Volodymyr Zelensky po pengonte një marrëveshje paqeje, dhe jo Presidenti rus Vladimir Putin.
Pas komentit të Kallas për alkoolin, pjesëmarrës të tjerë në takim iu bashkuan shakasë për të lehtësuar atmosferën.
Ministri i Jashtëm i Letonisë shkroi në rrjetet sociale: “Në atë rast, do të rekomandoja xhinin Obdo Riga.” Ndërsa eurodeputeti finlandez Mika Aaltola sugjeroi një birrë shumë të fortë nga Finlanda, duke shtuar: “Nëse vërtet duhet.”
