Foto: predsjednik.me
Presidenti i shtetit, Jakov Millatoviq, ka dërguar Kuvendit propozimin për shpalljen e një referendumi mbi futjen e listave të hapura në legjislacionin zgjedhor, njoftoi Presidenca.
“Pas shumë takimeve pune me ju në të gjithë Malin e Zi, kam vendosur të dërgoj Kuvendit propozimin për shpalljen e një referendumi mbi futjen e listave të hapura në legjislacionin tonë zgjedhor. Listat e hapura sjellin një ndryshim të madh dhe të nevojshëm. Në zgjedhjet e ardhshme, dëshirojmë të rikthejmë të drejtën tonë kushtetuese për të zgjedhur njerëzit me emër dhe mbiemër, në vend që të shënojmë vetëm emrat e partive ose koalicioneve,” tha presidenti.
Ai shtoi se në fletën e votimit, përveç shënimit të emrit të listës, dëshiron që qytetarët të kenë të drejtën të votojnë për njerëzit që njohin dhe të cilëve u besojnë.
“Do të votojmë për njerëzit që kanë merituar besimin tonë. Grupi Punues i Kuvendit për reformën zgjedhore, pas referendumit, më nuk do të ketë justifikime për të vazhduar me vonesa, ndërsa kundërshtarët e listave të hapura brenda partive do të përballen me një vendim të qartë të qytetarëve,” tha Millatoviq.
Ai theksoi se referendumi është mënyra e vetme për të siguruar zbatimin e vullnetit të qytetarëve dhe për të imponuar detyrimin e deputetëve që të punojnë në interes të qytetarëve, jo për shefat e partive të tyre.
“Kërkesa për shpalljen e referendumit dhe vendimi juaj për të futur listat e hapura janë një veprim për demokracinë dhe zhvillimin demokratik, për drejtësi dhe një Mal të Zi të ndershëm. Për njerëzit të cilëve u besojmë,” theksoi presidenti i shtetit.
